İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 373 Hüküm no: 358 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta v. Nakü’nün Sarıyer’deki kasap dükkânı gediği hissesini Seyyid Mehmed’e satması Kasab Ferâğı Ma‘rûz Hudâvendigâr-ı sâbık cennet-mekân firdevs âşiyân Gāzi Sultan Abdülhamid han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde vâki‘ ganem salhânelerinden dördüncü salhâneye merbût mahrûse-i Galata’ya tâbi‘ Sarıyer karyesinde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf-ı şâyi‘ine bâ-temessük-i mütevellî mutasarrıf olan Kosta v. Nakü zimmî meclis-i şer‘-i hatîrde hâssa kasabbaşısı izzetlü Mustafa Ağa tarafından mürsel Kasablar Kethudâsı Süleyman Ağa ve sâir kasab ustaları hâzır oldukları hâlde kasab ustalığını idâreye kādir idüğü ihbâr olunan bâ‘isü’l-i‘lâm es-Seyyid Mehmed b. es-Seyyid Hüseyin mahzarında takrîr-i kelâm edip ber-vech-i muharrer mutasarrıf olduğu nısf âlât-ı lâzıme-i ma‘lûmemi hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî merkūm es-Seyyid Mehmed’e fâriğ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm sâlifü’z-zikr kasab dükkânı gediği ta‘bîr olunan âlât-ı lâzıme-i ma‘lûmenin nısf-ı şâyi‘i merkūm es-Seyyid Mehmed’in hakk-ı müfevvezi olup benim alâka ve medhalim kalmamışdır dedikde merkūm es-Seyyid Mehmed dahi ba‘de’t-tasdîk nısf gedik-i mezkûr fâriğ-i mersûmun kasr-ı yedinden merkūm es-Seyyid Mehmed üzerine defter-i vakf-ı şerîfe ba‘de’l-kayd zabtı için hâmiş-i temessüke tahrîr ve temhîr ve yedine i‘tâsını istid‘â eylediği İstanbul Mahkemesi’nden huzûr-ı [âlîlerine i‘lâm olundu]. Fî 26 Rebî‘ülâhir sene 1223.