İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 374 Hüküm no: 359 Orijinal metin no: [48b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Halil İbrahim ve vefat eden Seyyid Ali’nin oğlu Hüseyin’in birbirleri aleyhindeki alacak iddialarından vazgeçmeleri Tarafeyn ibrâ Ma‘rûz Derûn-ı arzuhâlde mezkûretü’l-ism es-Seyyid Halil İbrahim b. Şâkir b. Hüseyin nâm kimesne meclis-i şer‘-i münîrde bundan akdem vefât eden es-Seyyid Ali b. Mustafa’nın sulbî kebîr oğlu ve terekesine vaz‘-ı yedi mütehakkık olan sâhib-i arzuhâl es-Seyyid Hüseyin mahzarında benim müteveffâ-yı mezbûr zimmetinde cihet-i karzdan yüz seksen yedi guruş alacak hakkım olmağla meblağ-ı merkūmu kable’l-ahz ve’l-istifâ mezbûr Ali fevt ve terekesini oğlu merkūm kabz ve vaz‘-ı yed etmekle meblağ-ı merkūmu tereke-i müteveffâ-yı mezbûreden taleb ederim deyü da‘vâ eyledikde ol dahi müdde‘âmı külliyen inkârından mâ‘adâ benim senin zimmetinde cihet-i karzdan doksan guruş alacak hakkım vardır deyü benden da‘vâya tasaddî ve ol-vechile beynimizde ba‘de vukū‘i’l-münâza‘a bâ-vesâtet-i muslihîn beynimiz tevfîk ve ıslâh olunup her birimiz tasaddî eylediğimiz da‘vâ-yı mezkûremizden bi’t-tav‘ ve’r-rızâ meccânen fâriğler olup bi’l-cümle zikr olunan husûslara ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden her birimiz âharın zimmetini ibrâ ve iskāt ve her birimiz ber-vech-i meşrûh âharın ibrâsını kabûl eyledik dediğini mezbûr es-Seyyid Hüseyin tasdîk ve ber-minvâl-i muharrer kabûlü hâvî ibrâ eylediğini tâyi‘an ve kat‘iyyen ikrâr ü i‘tirâf edip bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 21 Rebî‘ülâhir sene 1223.