İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 374 Hüküm no: 360 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Hüseyin’in gedik bedeli hususunda Habibe bt. Abdullah aleyhindeki alacak davasında anlaşma sağlanması 40 guruşa sulh Ma‘ruz, İstanbul’da Tercümanyunus mahallesinde sâkine ve zâtı mu‘arrefe Meryem bt. Hüseyin nâm Hatun meclis-i şer‘-i münîrde Habibe bt. Abdullah nâm hatun tarafından husûs-ı âti’l-beyânda vekîl olduğu zâtını ârifân Hafız Kâmil Efendi b. Mehmed Emin ve Mehmed Beşe b. Mehmed nâm kimesneler şehâdetleriyle sâbit olan el-Hâc İbrahim Edhem Ağa b. Mehmed nâm kimesne muvâcehesinde İstanbul’da Acemoğlanı Meydanı kurbünde Kuyucu Murad Paşa Türbesi civârında vâki‘ bir bâb kalemtraşçı dükkânı bâ-pâye-i İstanbul kādısı Uşşâkîzâde hafîdi fazîletlü Mehmed Said Efendi hazretlerinin bi’l-icâreteyn taht-ı tasarruflarında ve derûnunda mevcûde gedik ta‘bîr olunan bâ-defter-i müfredât âlât-ı lâzıme ve eşyâ-yı ma‘lûme müvekkile-i mezbûre Habibe Hatun’un yedinde malı iken müvekkile-i mezbûre âlât ve eşyâ-yı mezkûreyi mu‘teber gedik olmak üzere yüz elli guruş semen-i medfû‘ ve makbûza bundan akdem bana bey‘ ü temlik ve teslîm, ben dahi iştirâ ve temellük ve tesellüm ve kabûl eylediğimden sonra dükkân-ı mezkûr bu def‘a vukū‘ bulan harîkde muhterik ve mutasarrıfı efendi-yi mûmâ-ileyh müceddeden binâ ve inşâ ve âhara bilâ-gedik îcâr etmekle ben dahi gedik bahâ olmak üzere müvekkile-i mezbûreye medfû‘um olan meblağ-ı merkūm yüz elli guruşu istirdâd ederim deyü tasaddî eylediğim da‘vâ-yı mezkûrumdan bâ-vesâtet-i muslihîn müvekkile-i mezbûre Habibe Hatun’a izâfetle işbu vekîl-i mezbûr el-Hâc İbraim Ethem Ağa ile bi’t-tav‘ ve’r-rızâ kırk guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâya ve bi’l-cümle husûs-ı mezkûra müte‘allika âmme-i de‘âvîden müvekkile-i mezbûre Habibe Hatun’un zimmetini ibrâ ve iskāt eylediğimde ol dahi ibrâ-yı mezkûrumu kabûl ve yedimde olup harîkde dükkân-ı mezkûrdan ihrâc eylediğim bir aded örsü müvekkile-i mezbûreye teslîme müte‘ahhide oldum dediğini vekîl-i mezbûr bi’l-vekâle tasdîk ve ibrâdan müstağnî bedel-i sulh-ı merkūm kırk guruşu müvekkilesi mezbûre Habibe Hatun’un zimmetinde müdde‘iye-i mezbûreye deyni olduğunu bi’l-vekâle ikrâr ü i‘tirâf etmeğin mûcebince bedel-i sulh-ı merkūm kırk guruşun müdde‘iye-i mezbûre Meryem Hatun’a edâsıyla müvekkile-i mezbûre Habibe Hatun’a izâfetle vekîl-i merkūm ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî 21 Rebî‘ülâhir sene 1223.