İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 380 Hüküm no: 366 Orijinal metin no: [49b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hacı Mustafa’nın Rüstempaşa Vakfı’ndan Sultan Odaları Hanı’ndaki oda gediğinin vârisleri tarafından Mehmed Ağa’ya satılması Oda ferâğı Ma‘rûz Müteveffâ Rüstempaşa Vakfı musattafâtından İstanbul’da Mahmud Paşa Câmi‘-i şerîfi kurbünde Sultan Odaları demekle ma‘rûf bir bâb Han’ın sol tarafında tabaka-i ulyâda kâin ikinci bir bâb oda derûnunda mevcûde gedik ta‘bîr olunur âlât-ı lâzıme-i ma‘lûmenin bâ-sûret-i hümâyûn mâliki olup bundan akdem vefât eden el-Hâc Mustafa b. el-Hâc Mustafa’nın verâseti zevce-i metrûkesi Âişe bt. Abdullah nâm hatun ile sulbî kebîr oğlu Ahmed’e inhisârı tahakkukundan sonra mezbûrân Ahmed ve zâtı mu‘arrefe Âişe Hatun meclis-i şer‘-i münîrde bâ‘isü’l-i‘lâm Mehmed Ağa b. Ömer [50a] muvâcehesinde hân-ı mezkûrun hancısı Arakil v. Ayvaz zimmî hâzır olduğu hâlde her biri bi’l-verâse takrîr-i kelâm edip zikr olunan bir bâb oda derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme mûrisimiz müteveffâ-yı mezbûrun hayatında ile’l-vefât şirâen yedinde malı ve ba‘de vefâtihî bize mevrûs olmağla biz âlât-ı lâzıme-i mezkûreyi tarafeynden bi’l-îcâb ve’l-kabûl bâtten ve sahîhan mezbûr Mehmed Ağa’ya bi-safkatin vâhidetin altı yüz guruş semen-i makbûza bey‘ ve temlik ve teslîm eylediğimizde, ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra mebî‘-i mezkûrun tağrîr ve gabnine müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt eyledik, fîmâ-ba‘d zikr olunan bir bâb oda gediğinde bizim aslâ ve kat‘a alâka ve medhalimiz kalmayıp mezbûr Mehmed Ağa’nın mülk-i müşterâsı ve hakk-ı sırfı olmuşdur dediklerinde mukırrân-ı mezbûrânın bi’l-cümle takrîr-i meşrûhlarını merkūm Mehmed Ağa ile Hancı hâzır-ı mersûmdan her biri tasdîk etmeğin sâlifü’l-beyân bir bâb odanın gediği Başmuhâsebe’de müteveffâ-yı merkūm el-Hâc Mustafa ismine mukayyed olmağla kaydı ref‘ ü terkīn ve vereseleri bey‘lerinden müşteri-yi mezbûr Mehmed Ağa üzerine kayd ve yedine sûret i‘tâ buyurulmak bâbında istid‘â-yı inâyet eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 2 Ca sene 1223.