İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 381 Hüküm no: 367 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. İsmail’in, Emine bt. Osman ve kardeşi Esma’ya verdiği evin ferağ işlemleri geçersiz olduğundan evin sahibine iade olunması Rumeli Kādıaskeri ile Arz Odası’nda …? menzil nizâ‘ı Ma‘rûz Sâhibe-i arzuhâl zâtı mu‘arref Fatıma Hatun bt. İsmail âhar arzuhâl bâlâsına sâdır olan fermân-ı âlî-şâna imtisâlen bi’l-ma‘iye rü’yete memûr hâlâ İstanbul Kādısı fazîletlü Dürrîzâde Mehmed Hidayetullah Efendi hazretleri taraflarından mürsel Kâtib Merhabâzâde Mahmud Efendi hâzır olduğu hâlde Cuma günü Arz Odası’da huzûr-ı hazret-i kāimmakām-ı âlî-makāmîde ma‘kūd meclis-i şer‘-i enverde zikri âtî menzile bâ-temessük-i mütevellî bi’l-münâsafe mutasarrıfeler olmalarıyla vaz‘-ı yedleri mütehakkıka olan derûn-ı arzuhâlde mezkûreteyi’l-ism zâtları mu‘arrefeler Emine ve Esma bintey Osman nâm hatunlar mahzarlarında İstanbul kādıları efendiler hazerâtı nezâretlerinde olan evkāfdan merhûm Salih Efendi Vakfı musakkafâtından İslâmbol’da Çerâğī Hamza mahallesinde vâki‘ bir tarafdan Alâiyevî kuzâtdan es-Seyyid Ahmed Efendi ve bir tarafdan Basmacı Said Ağa ve bir tarafdan ba‘zan Altıboğaça İmâmı bahçesi ve ba‘zan Çeşmeli Odaları ve bir tarafdan tarîk-i âm ile mahdûd bir bâb menzil mukaddemâ bi’l-icâreteyn tasarrufumda iken menzil-i mezkûru bin iki yüz yirmi senesi Zilka‘deti’ş-şerîfesi’nin yirmi yedinci günü târihiyle merkūmetân Emine ve Esma hatunlara ferâğ eder oldukda beni ölünceye beslemek şartıyla bâ-re’y-i mütevellî bilâ-bedel ferâğ ve tefvîz ve onlar dahi tefevvüz edip ol-vechile olan ferâğ-ı mezkûre binâen tasarruf ederler iken şart-ı mezkûr ile olan ferâğ mu‘teber olmamağla menzil-i mezkûrdan keff-i yed ve bâ-re’y-i mütevellî bana geri ferâğ ve tefvîze merkūmetân Emine ve Esma hatunlara tenbîh olunmak murâdımdır deyü vakıf mütevellîsi Mustafa Efendi tarafından mürsel câbî-i vakıf Mehmed Efendi hâzır olduğu hâlde da‘vâ etdikde, onlar dahi cevâblarında müdde‘iye-i merkūme Fatıma Hatun menzil-i mezkûru târih-i merkūmda medîne-i Üsküdar’da Sultantepesi nâm mahâlde vâki‘ menzilinde yedimizden ahz ü kabz eylediği dört bin guruş bedel mukābelesinde bâ-re’y-i mütevellî bize kat‘iyyen fâriğa olmuş idi deyü müdde‘iye-i merkūmenin şart-ı mezkûr müdde‘âsını ba‘de’l-inkâr müdde‘iye-i mezbûre Fatıma Hatun şart-ı mezkûr müdde‘âsına ve merkūmetân Emine ve Esma hatunlar dahi meblağ-ı mezkûr dört bin guruş bedel müdde‘âlarını beyâna havâle olundukda müdde‘iye-i merkūme Fatıma Hatun şart-ı mezkûr müdde‘âsını lede’t-tezkiye adl ve makbûlü’ş-şehâde idükleri ihbâr olunan İmâm Mehmed Efendi b. Hüseyin ve Ahmed b. Hüseyin nâm kimesnelerin bi’l-muvâcehe vech-i vecîh-i şer‘î üzere şehâdetleriyle Arz Odası’nda isbât etmeğin mûcebiyle menzil-i mezbûrdan keff-i yed ve bâ-re’y-i mütevellî müdde‘iye-i merkūme Fatıma Hatun’a geri tefvîze merkūmetân Emine ve Esma hatunlara tenbîh olunduğu huzûr-ı âlîlerine i‘lâm olundu. Fî 29 Rebî‘ülâhir sene 1223.