İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 382 Hüküm no: 369 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub Ağa’nın Karamürsel Naibi Mustafa Efendi aleyhindeki cariye davasının reddedilmesi Câriye da‘vâsından mu‘ârazadan men‘ Ma‘rûz Sâhib-i arzuhâl Yakub Ağa b. el-Hâc İsmail nâm kimesne meclis-i şer‘-i münîrde müderrisîn-i kirâmdan hâlâ Karamürsel Nâibi derûn-ı arzuhâlde mezkûrü’l-ism es-Seyyid Mustafa Efendi b. Mehmed tarafından husûs-ı âtîde vekîl olduğu Yusuf Ağa b. el-Hâc Hasan ve İbrahim Ağa b. Mustafa nâm kimesneler şehâdetleriyle sâbit olan el-Hâc Halil Efendi b. Abdullah nâm kimesne muvâcehesinde târih-i i‘lâm senesi Muharrem’inde cemî‘ uyûbdan sâlime olmak üzere müvekkil-i mûmâ-ileyhimden altı yüz yirmi guruş semen-i medfû‘ ve makbûza iştirâ ve kabz eylediğim işbu meclis-i şer‘de mu‘âyene olunan ma‘lûmetü’l-evsâf bir re’s zenciye câriyenin istiskā-i dîk illeti olduğu hâmiş-i arzuhâlde mastûr Ser-etibbâ-yı Hâssa efendinin i‘lâmından müstebân olup ol-vechile mu‘ayyebe ve ayb-ı mezkûr şirâ târihinden kadîm ve inde’t-tüccâr noksân-ı semen îcâb eder uyûbdan olmağla redd-i semen ve kabz-ı mebî‘ olunmak matlûbumdur deyü teveccüh-i husûmet bulundukdan sonra da‘vâ etdikde vekîl-i mezbûr dahi cevâbında câriye-i mezkûreyi müvekkilim mûmâ-ileyh es-Seyyid Mustafa Efendi müdde‘î- merkūm Yakub Ağa’ya ol-mikdâr guruş semen-i makbûza cemî‘ uyûbuyla bey‘ ü temlik ve teslîm, ol dahi iştirâ ve temellük ve tesellüm ve kabûl etmekle hattâ ayb-ı mezkûra muttali‘ oldukdan sonra mu‘âlece edip ve ba‘dehû esir pazarında bey‘e arz etmiş idi deyü sûret-i def‘de bi’l-vekâle eylediği da‘vâsına ikāmet-i beyyine edemeyip bi’t-taleb mezbûr Yakub Ağa ayb-ı mezkûra muttali‘ oldukdan sonra kabûlünü müş‘ir kavlen ve fi‘ilen kendüden nesne sâdır olmadığına bi’l-muvâcehe vech-i şer‘î üzere üç def‘a yemîn teklif olundukda ol dahi yemînden nükûl etmeğin mûcebince müdde‘î-i mezbûr Yakub Ağa da‘vâ-yı mezkûresiyle mûmâ-ileyh es-Seyyid Mustafa Efendi’ye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fi 2 Ca sene 1223.