İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 383 Hüküm no: 370 Orijinal metin no: [50a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici esnafının ve tüccarların Kayseri’deki sayalamacı esnafından şikâyette bulunmaları Dikici esnâfıyla sayalmacıların dara nizâ‘ı Ma‘rûz Ashâb-ı arzuhâl Dikicibaşı İbrahim Ağa ve Başyiğitbaşı es-Seyyid İbrahim ve Mestçiler Yiğitbaşısı Ahmed Usta ve Çedikçiler Kethudâsı es-Seyyid Hasan ve Çizmeciler Köşe Ustası Ebûbekir ve es-Seyyid Ömer ve Mahmud ve Ahmed ve Kömür Alemdar ve es-Seyyid Mehmed ve İbrahim ve diğer Ahmed ve sâir bi’l-cümle dikici esnâfı meclis-i şer‘-i münîrde Tâcirler Kethudâsı İsmail Ağa ve yiğitbaşısı Mustafa ve Bahçecizâde Ahmed Efendi ve es-Seyyid Mustafa ve es-Seyyid el-Hâc Mehmed ve es-Seyyid el-Hâc Osman ve es-Seyyid Hafız Mehmed ve el-Hâc Mehmed ve Hüseyin Efendi ve es-Seyyid Osman ve Kara Hacı Mehmedoğlu ve Memiş ve Parlak el-Hâc Hasan ve es-Seyyid Mehmed ve es-Seyyid Mustafa ve sâir bi’l-cümle tâcir esnâfı hâzır oldukları hâlde her biri takrîr-i kelâm edip medîne-i Kayseriye’de hâsıl olan sahtiyân fiyât-ı selâse-i maktû‘ası olan dört adedi bir dara ta‘bîr olunur kiraz vakti derisinin bir darası on dört guruşa ve nakliye mesârifi ve resm-i gümrüğü ve hâzırûn-ı merkūmûna bir guruş fâide ki cem‘an on yedi guruşa ve kezâlik dört adedi bir dara ta‘bîr olunur Sivas derisinin bir darası sahtiyânı on üç guruşa ve nakliye ve resm-i gümrük ve fâide ki cem‘an on altı guruşa ve kezâlik dört adedi bir dara ta‘bîr olunur Arabgir derisinin bir dara sahtiyânı on bir guruşa ve nakliye ve resm-i gümrük ve fâide ki cem‘an on dört guruşa olup işbu fiyât-ı selâse ile her bir nev‘ [50b] sahtiyân a‘lâ ve evsat ve ednâsı fark olmayarak Âsitâne-i aliyye’ye gelir iken bir müddetden beri medîne-i mezbûre debbâğları on bir guruş kıymeti olan sahtiyândan dahi dûn olarak işbu meclis-i şer‘de mu‘âyene olunan sahtiyân kiraz derisi sahtiyânı yerine tâcir esnâfı hâzırûn-ı mezbûrûna gönderip onlar dahi on yedişer guruşa kiraz derisi sahtiyânı yerine bizlere bey‘ ve kiraz derisi sahtiyânı ve nev‘-i âharların a‘lâlarını sayalamacı ta‘bîr olunur Kayseriye ve İskilib’de sâkin mest i‘mâl eden dikici tâifelerine füruht edip i‘mâl eyledikleri mestleri Âsitâne-i aliyye’ye celb eylediklerinde han odalarında ve köşe ve bucaklarda hufyeten gālî bahâ ile ibâdullâha bey‘ eylediklerine binâen mahâllinde sahtiyânın bahâsına bakmayıp a‘lâsını ziyâde bahâ ile iştirâ etmeleriyle Âsitâne-i aliyye’ye bu derecelerde fenâ ve kalb ve redî sahtiyânın gelmesine sebeb-i küllî olmağla sayalamanın men‘ ü ref‘inde mahzûr münfehim olduğuna binâen fîmâ-ba‘d mahâllinde sayalamacılara bey‘ edecekleri sahtiyân a‘lâ ve evsat ve ednâ olarak mukaddemâ ta‘ahhüdleri vechi üzere bey‘ edip onlar dahi i‘mâl eyledikleri mestlerin bir dânesini diyâr-ı âhara bey‘ etmeyip doğru Âsitâne-i aliyye’ye gönderip resm-i gümrüğü ba‘de’l-edâ han odalarına ve köşe ve bucaklara konmayıp gümrük emînleri ma‘rifetiyle doğru Mercan Çarşısı’nda haffâf esnâfının lonca odasına irsâl ve bi’l-cümle haffâf ve tâcirler ve dikicibaşı ma‘rifetleriyle narh-ı cârîsi üzere haffâfân esnâfına tevzî‘ ve taksîm olunup akçesi kā‘ide-i tüccâr üzere vakt ü zamanıyla tahsîl ve ashâbına teslîm ve nizâm-ı mezkûrun devam ve istikrârı zımnında esnâf-ı merkūmûn yedlerine tuğrâ-yı garrâ ile müveşşah bir kıt‘a fermân-ı âlî-şân sudûrunu niyâzında olup ve mâ‘adâ Âsitâne-i aliyye’ye gönderilecek sahtiyânlar dahi fiyât-ı selâse-i maktû‘asıyla a‘lâ ve evsat ve ednâ gönderilmesi husûsu bir nizâm tahtına rabt olunması için mahâllinde debbâğlar şeyhi olan es-Seyyid Mustafa azil ve ihrâc olunup yerine Emir Caferoğulları demekle meşhûr el-Hâc Hasan oğlu Molla Mehmed müstakīm ve mütedeyyin ve her vechile sadâkāt ve istikāmet edeceği şöhret-şi‘âr olmağla şeyh nasb olunup ve taraf-ı Devlet-i aliyye’den bir münâsib mübâşir ta‘yîniyle sâbık Şeyh es-Seyyid Mustafa ile esnâfından aveneleri olup bi’l-külliye işbu nizâm-ı müstahsenenin ihtilâline bâ‘is olan el-Hâc Kasımoğlu es-Seyyid Mehmed ve el-Hâc İbiş ve Emir Caferoğlu Hacı Sofu demekle ma‘rûf Mehmed ve Karabacak Ahmed ve Tuzcuoğlu el-Hâc Mehmed ve Simitçioğlu Mehmed ve Külhan Ağası oğlu Derviş Mehmed ve Perdahtçıoğlu İsmail ve Perdahtçı Veli Mehmed nâm kimesneler Âsitâne-i aliyye’ye ihzâr ve irsâl eyledikleri sahtiyânları muvâcehelerinde meclis-i şer‘de mu‘âyene olundukda mukaddem ta‘ahhüdleri vechi üzere tanzîm ve râbıta mı bulur yoksa merkūmûnun te’dibleri mi iktizâ eder beher hâl işbu nizâm-ı müstahsenenin devam ve istikrârı zımnında merkūmûnun ahz ve ihzârı lâzıme-i hâldendir deyü bi’l-cümle dikici esnâfı istirhâm eylediklerinde hâzırûn-ı mezbûrûn tâcir esnâfı dahi istintâk olundukda bizler dahi bu husûsa bi’d-defa‘ât mektûb tahrîr eylediğimizde bir vechile mücâb olmayıp inâdlarında ısrâr üzere olduklarını ifâde ve dikici esnâfı merkūmûnun istid‘âları üzere mezbûrûnun Âsitâne-i aliyye’ye ihzârları bizim dahi bi-ecma‘ihim matlûbumuzdur deyü bu vechile cümlesinin istirhâmlarına ve ayakkabılarının nizâmları muhâfaza zımnında bir münâsib mübâşir ta‘yîniyle medîne-i Kayseriye hâkimi ve mütesellimine hitâben diğer bir kıt‘a ki cem‘an iki kıt‘a fermân-ı âlîleri sudûru iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 5 Ca sene 1223.