İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 392 Hüküm no: 377 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Subaşı Mehmed Emin’den haksız yere almış olduğu parayı iade etmesi hususunda İstemat v. Panayot’a tenbihte bulunulması 700 guruşu edâya tenbîh Ma‘rûz Mahrûse-i Galata hâricinde Beyoğlu nâm mahâlde sâbıkā voyvoda olan Kalın Mehmed Ağa’nın subaşılık hizmetinde olan sâhib-i arzuhâl Mehmed Emin b. Abdullah nâm kimesne meclis-i şer‘-i münîrde derûn-ı arzuhâlde mersûmü’l-ism İstemat v. Panayot nâm zimmî muvâcehesinde mersûm İstemat zimmî bundan akdem mahâll-i mezkûrda kendüye ecnebiye olan bir avratın menziline fi‘il-i şenî‘ kasdıyla duhûl edip ben dahi subaşı olmak takrîbiyle menzili basıp zimmî-yi mersûmu ahz ve voyvoda-i mezbûreye teslîm eylediğimde voyvoda-i mezbûr dahi birkaç gün hapis ve ba‘dehû sebîlin tahliye edip ben zimmî-yi mersûmdan cerîme nâmıyla kat‘a nesne almamış iken mersûm İstemat zimmî sene-i sâbıkā Ramazan’ının üçüncü günü benden Bâb-ı âlî’de sa‘âdetlü çavuşbaşı ağaya bâ-arzuhâl iştikâ ve benim aslâ sun‘um yoğiken subaşı-yı mezbûr beni menziline da‘vet edip cerîme nâmıyla malımdan bi-gayrı hakkın zulmen yedi yüz guruşumu ahz ü kabz etmekle meblağ-ı merkūmu istirdâd ederim deyü da‘vâ ve beni bilâ-mürâfa‘a tomruğa hapsetdirdip malımdan yedi yüz guruşumu bi-gayrı hakkın almağla makbûzu olan meblağ-ı merkūmu mersûm İstemat zimmîden geri taleb ederim deyü da‘vâ etdikde zimmî-yi mersûm dahi cevâbında müdde‘î-i mezbûr Mehmed Efendi’den vech-i meşrûh üzere meblağ-ı merkūm yedi yüz guruşu bilâ-mürâfa‘a kabzını ikrâr lâkin mukaddemâ beni menziline da‘vet edip cerîme nâmıyla malımdan bi-gayrı hakkın zulmen yedi yüz guruşumu ahz ü kabz etmekle, ben dahi binâen-aleyh meblağ-ı merkūmu bi-hakkın kabz eyledim deyü sûret-i def‘de eylediği da‘vâsına ikāmet-i beyyine edemeyip tahlîfe dahi tâlib olmamağın mûcebince dâfi‘-i mersûm İstemat zimmî def‘-i mezkûruyla müdde‘î-i mezbûre bilâ-beyyine mu‘ârazadan ba‘de’l-men‘ zimmî-yi mersûmun sâlifü’l-beyân ikrâr ve i‘tirâfıyla lâzım gelen meblağ-ı merkūm yedi yüz guruşu müdde‘î-i mezbûr Mehmed Efendi’ye edâ ve teslîme mersûm İstemat zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 8 Ca sene 1223.