İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 393 Hüküm no: 378 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Langa Yenikapı İskelesi kayıkçılarının, Kayıkçı Ahmed Beşe ve oğlu Hasan’ın esnaflıktan ihracını taleb etmeleri Esnâfdan ihrâcını iltimâs Ma‘rûz Âsitâne-i aliyye hısnı ebvâbından Langa Yenikapı İskelesi kayıkçılarının kethudâ vekîli Hüseyin Beşe b. Ömer ile iskele-i merkūme kayıkçılarından İbrahim b. Abdullah ve Mustafa b. Ahmed ve es-Seyyid Süleyman ve es-Seyyid İbrahim ve İsmail ve sâirleri meclis-i şer‘-i münîrde iskele-i merkūmede kayıkçı olan es-Seyyid Ahmed Beşe b. Ali muvâcehesinde merkūm es-Seyyid Ahmed Beşe ve gāib ani’l-meclis oğlu Hasan nâm kimesneler kendi hâllerinde ırzlarıyla mukayyed olmayıp bed-zebân ve hadîdü’l-lisân olup her birimize dürlü dürlü elfâz-ı kabîha ile şetm ve itâle-i lisân eylediklerinden mâ‘adâ iyâli dahi iskele-i merkūmeye gelip bizlere şütûm-ı galîza ve ekserîmizi darb etmekle bi’d-defa‘ât kendülere nush u bend olundukda kat‘a müfîd olmayıp mütecâsir oldukları harekât-ı nâ-marzıyelerinde ısrâr üzere olmalarıyla mezbûrânın bu vechile harekât-ı nâ-bercâlarından cümlemizin emn ü rahatımız meslûb olmağla merkūm es-Seyyid Ahmed Beşe muvâcehesinde sû-i hâllerinden bahisle iştikâ ve merkūmân es-Seyyid Ahmed Beşe ve oğlu Hasan’ın iskele-i merkūmede işlemeyip âhar mahalle hurûçlarına cümlesi bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 7 Ca sene 1223.