İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 394 Hüküm no: 379 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serope v. Parsam ve Maryam bt. Kabril’in tasarrufunda olan menzillerini şerbethaneye satmamak üzere taahhütte bulunmaları Menzilini şerbethâneye ilâve etmemeğe ta‘ahhüd Ma‘rûz İstanbul’da Karagümrük kurbünde Ali Paşa-yı atik mahallesi imâmı Lütfullah Efendi ve ahâlisinden gümrük-i mezkûr Başkâtibi Mustafa Efendi ve Arabacılar kethudâsı el-Hâc Mehmed Ağa ve Yiğitbaşı Ali Ağa ve Sirem arabacıları Yiğitbaşısı Mustafa Ağa ve Hancı Haseki Mehmed Ağa ve Ali Ağa ve diğer Ali Ağa ve Hüseyin Ağa ve re‘âyâdan Dülger Toros v. Asvador zimmî ve şahısları mu‘arrefe Neri bt. Kerupa ve Maryem bt. İsayi ve Sogma bt. İlya Nasrâniyeler ile sâir mazbûtü’l-esâmî Müslim ve re‘âyâ meclis-i şer‘-i münîrde yine mahalle-i mezbûre mütemekkinlerinden Serope v. Parsam zimmî ve şahsı mu‘arrefe diğer Maryam bt. Gabril Nasrâniye muvâcehelerinde ashâb-ı hayrâtdan merhûm el-Hâc Memi Vakfı musakkafâtından mahalle-i mezbûrede vâki‘ her biri şehriye yirmişer akçe icâre-i müecceleli ma‘lûmü’l-hudûd iki bâb vakıf menzilin biri mersûm Serope zimmînin ve biri mesfûre diğer Maryem Nasrâniyenin bâ-temessük-i mütevellî tasarruflarında olup lâkin menzileyn-i mezkûreyn mahalle-i merkūmede kâin şerbethâneye muttasıl olmağla mersûmân dahi bu esnâda menzileyn-i mezkûreyni şerbethâne-i mezkûrenin gediğine mâlik olan gāib ani’l-meclis ( ) zimmîye şerbethâne-i mezkûreye ilâve etmek için ferâğ ve kasr-ı yed murâd etmeleriyle bizim ber-vech-i muharrer şerbethâne-i mezkûrenin tevsî‘ olmasına rızâmız olmayıp her ne zaman mersûmân menzileyn-i mezkûreyni ferâğ murâd ederler ise yine kemâ-kân menzil olmak üzere âhara fâriğler olup gāib-i mersûma fâriğler olmamak üzere mersûmân Serope zimmî ve diğer Maryem Nasrâniyeye tenbîh olunmak matlûbumuzdur dediklerinde onlar dahi cevâblarında husûs-ı mezkûru tasdîk ve menzileyn-i mezkûreyni her ne zaman fâriğler olur isek yine ahâli-i mahallenin re’y ve ittifâkıyla ke’l-evvel menzil olmak üzere âhara fâriğler olup gāib-i mersûma fâriğler olmamak üzere her biri müte‘ahhid ve eğer hilâf-ı ta‘ahhüd gāib-i mersûma fâriğler olur isek ve Şerbethâne-i mezkûreye ilâve etdirir isek ma‘rifet-i şer‘le hakkımızda iktizâ eden tedîbât-ı lâyıkamız icrâ olunmasına râzılarız deyü bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 27 Rebî‘ülâhir sene 1223.