İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 396 Hüküm no: 381 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger Mosis’in Ayşe bt. Mahmud aleyhindeki arsa davasında anlaşma sağlanması Keşif Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi hâssa mi‘mârı hulefâsından es-Seyyid Mustafa ve Mehmed halîfeler ile İstanbul’da Yedikule kurbünde Mirâhor mahallesinde vâki‘ nezâret-i dâ‘îlerinde âsûde evkāfdan Bevvâb-ı sultânî Hasan Bey Vakfı’ndan münâza‘un-fîh olan menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde arzuhâl eden Dülger Mosis v. Alev nâm zimmî meclis-i ma‘kūd-ı mezkûrda derûn-ı arzuhâlde mastûretü’l-ism Şerife Âişe bt. Mahmud nâm Hatun tarafından husûs-ı âti’l-beyânda vekîl olduğu zâtını ârifân Mehmed Ağa b. İbrahim ve es-Seyyid Hasan b. Halil şehâdetleriyle sâbit olan Muslı Efendi b. İbrahim mahzarında vakf-ı mezbûr mütevellîsi es-Seyyid el-Hâc Hafız Mustafa Efendi tarafından mürsel vekîli Süleyman Çelebi b. Ömer ve şahsı mu‘arrefe Malime bt. Hürmüz Nasrâniye hâzır oldukları hâlde hâzıra-i mersûme Malime Nasrâniye müvekkile-i mezbûreye bi-tarîki’l-vefâ fâriğ olduğu menziline benim vakf-ı merkūm musakkafâtından mutasarrıf olduğum menzil arsasından elli zirâ‘ mahâllini gasb etmekle kasr-ı yedine tenbîh olunmak matlûbumdur deyü da‘vâya tasaddî eylediğimde vekîl-i mezbûr ile mesfûre Malime Nasrâniye inkâr ve beynimizde ba‘de vukū‘i’l-münâza‘a bâ-tavassut-ı muslihîn vekîl-i mezbûr ve mesfûre Malime Nasrâniye ile arzan iki zirâ‘ ve tûlen Sonkara Şerbethânesi duvarına varınca beş zirâ‘ terbî‘an on zirâ‘ arsadan vekîl-i mezbûr ile mesfûre Malime Nasrâniye keff-i yed edip min-ba‘d husûs-ı mezkûra dâir kat‘a da‘vâ ve nizâ‘ımız yokdur dedikde mütevellî-i vekîl-i mezbûr dahi tasarruflarına izin verdiğini mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı [âlîlerine i‘lâm olundu]. Fî 7 Ca sene 1223.