İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 397 Hüküm no: 382 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazaret v. Sagater’in Galata Karanlıkçarşı’da yanan menzil arsası üzerine inşa edeceği dükkânda tütün satmayacağına dair taahhütte bulunması Dükkânda duhân bey‘ etmemeğe ta‘ahhüd Ma‘rûz İstanbul’da vâki‘ tütüncü esnâfının kethudâsı İbrahim Ağa ve Yiğitbaşı es-Seyyid Abdullah ile tüccârdan Fındıklı Ali Ağa ve Galata Kethudâ vekîli Mustafa Ağa ile a‘yândan Kiryako v. Rizo ve Kirkor ve Sarı Kokas ve diğer Kirkor ve sâir Müslim ve zimmîler meclis-i şer‘-i münîrde derûn-ı arzuhâlde mestûrü’l-ism Nazaret v. Sagater zimmî muvâcehesinde mahrûse-i Galata’da Karanlıkçarşı’da kömürcü ittisâlinde kâin bir bâb muhterik menzil arsası mersûm Nazaret zimmînin bi’l-icâreteyn taht-ı tasarrufunda olmağla zimmî-yi mersûm arsa-i merkūmeyi bu esnâda menzil ve tahtında bir bâb dükkân binâsına şürû‘ edip lâkin tekmîlinde duhâncı olmak üzere müceddeden tütüncü dükkânı gediği ihdâs murâd etmekle bizim dükkânlarımız Ma‘den Kalemi’nde mukayyed ve mu‘teber ve ma‘dûd olup müceddeden tütüncü dükkânı ihdâsı hilâf-ı fermân-ı âlî ve mugāyir-i nizâm-ı kadîm olduğundan mâ‘adâ esnâfımız beyninde cârî ve mu‘teber ve düstûrü’l-amel olan şurût-ı nizâmımızın ihtilâlini [53a] müstelzim nizâ‘ı mûcib bir keyfiyet olmağla dükkân-ı mezkûr tütüncü dükkânı olmamak üzere mersûma tenbîh olunmak murâdımızdır deyü cümlesi bi’l-ittifâk iştikâ eylediklerinde zimmî-yi mersûmun vech-i muharrer üzere müceddeden tütüncü dükkânı küşâdı hilâf-ı emr-i âlî ve mugāyir-i şurût-ı nizâm olduğu mersûm Nazaret zimmîye tefhîm olundukda zimmî-yi mersûm dahi dükkân-ı mezkûr tekmîlinde duhân bey‘ etmeyip dahi ticâretle meşgūl olmak üzere ta‘ahhüd eylediği İstanbul Mahkemesi’nden huzûr-ı [âlîlerine i‘lâm olundu]. Fî 11 Ca sene 1223.