İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 400 Hüküm no: 385 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’ya kefaletden dolayı olan borcunu ödemesi hususunda Oseb v. Eften’e tenbihte bulunulması Kadırga Limanı’nda berber gediği Ma‘rûz Sâhib-i arzuhâl Karahisârî Mehmed Ağa b. Halil nâm kimesne meclis-i şer‘-i münîrde derûn-ı arzuhâlde mersûmü’l-ism Oseb v. Eften nâm zimmî muvâcehesinde kezâlik derûn-ı arzuhâlde mersûmü’l-ism Berber Ağyazar v. Artin nâm zimmî hâzır olduğu hâlde hâzır-ı mersûm Ağyazar zimmî bin iki yüz on sekiz senesinde İstanbul’da Kadırga Limanı nâm mahâlde kolluk civârında kâin bir bâb berber dükkânı derûnunda mevcûde bâ-defter-i müfredât âlât-ı lâzıme ve eşyâ-yı ma‘lûmeyi Başmuhâsebe’de mukayyed ve mu‘teber ve ma‘dûd gediklerdendir deyü dokuz yüz yirmi beş guruş semen-i medfû‘ ve makbûza bana bey‘ ü temlik ve teslîm ben dahi vech-i meşrûh üzere iştirâ ve temellük ve tesellüm ve kabz ü kabûl eylediğimden sonra şehr-i sâbık Rebî‘ülâhiri gurresinde dükkân-ı mezkûr mutasarrıfları gāibân ani’l-meclis es-Seyyid Hüseyin Ağa ve es-Seyyid İbrahim Edhem Ağa b. el-Hâc Mustafa nâm kimesneler dükkân-ı mezkûrda gedik i‘tibârı yokdur deyü Çarşamba günü Arz Odası’nda huzûr-ı hazret-i kāimmakām-ı âlî-makāmîde ma‘kūd meclis-i şer‘de berber esnâfı hâzır oldukları hâlde benimle mürâfa‘a ve dükkân-ı mezkûrun gediği Başmuhâsebe’de mukayyed ve mu‘teber olmadığı zâhir ve âşikâr olmağın ol-vechile gāibân-ı merkūmân derûnunda mevcûde âlât ve eşyâ-yı mezkûreyi bana teslîm ve dükkân-ı mezkûrdan beni bâ-i‘lâm ihrâc etdirmeleriyle bu sûretde gedik-i mezkûr yedimden nez‘ olunmağla ben dahi âlât ve eşyâ-yı mezkûreyi hâzır-ı mersûm Ağyazar zimmîye bundan akdemce [53b] redd ü teslîm ve semen olmak üzere medfû‘um olan meblağ-ı merkūmu istirdâd eylediğimde hâzır-ı mersûm dahi âlât ve eşyâ-yı mezkûreyi yedimden tamamen ahz ü kabz ve makbûzu olan meblağ-ı merkūm dokuz yüz yirmi beş guruş zimmetinde bana sahîhan deyni olduğunu ikrâr ü i‘tirâf ve meblağ-ı merkūma işbu mesfûr Oseb zimmî tarafından bi’l-emr ve’l-kabûl kefîl ve zâmin olmağla meblağ-ı merkūmu kefâletine binâen mesfûr Oseb zimmîden taleb ederim deyü da‘vâ etdikde ol dahi husûs-ı mezkûr hâzır-ı mersûmdan istintâk olundukda cevâbında âlât-ı mezkûreyi Başmuhâsebe’de mukayyed ve mu‘teber ve ma‘dûd gedik olarak müdde‘î-i mezbûra ol-mikdâr guruş semen-i makbûza bey‘ini ve ber-minvâl-i muharrer gedik-i mezkûr müdde‘î-i mezbûr Mehmed Ağa’nın yedinden bâ-i‘lâm nez‘ olduğunu ikrâr, lâkin âlât ve eşyâ-yı mezkûreyi geri kabzını ve mesfûr Oseb zimmî dahi ber-vech-i meşrûh kefâletini herbiri inkâr etmeleriyle müdde‘î-i mezbûr Mehmed Ağa ber-vech-i muharrer müdde‘âsını şehâdetleri makbûle olan Molla Süleyman b. İbrahim ve Feyzullah Ağa b. Mehmed Salih ve es-Seyyid Mehmed Said Ağa b. el-Hâc Abdülhalim nâm kimesneler şehâdetleriyle muvâcehelerinde vech-i şer‘î üzere isbât etmeğin mûcebince meblağ-ı merkūm dokuz yüz yirmi beş guruşu müdde‘î-i mezbûr Mehmed Ağa’ya bi-hükmi’l-kefâle edâ ve teslîme mesfûr Oseb zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 10 Ca sene 1223.