İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 403 Hüküm no: 389 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık Efendi’nin, Nuri Beyefendi’de olan alacağını tecil etmesi 255 guruşu tecîl Ma‘rûz Bâ-işâret-i aliyye sâdır olan fermân-ı âlîlerine imtisâlen sâhib-i arzuhâl es-Seyyid Hafız el-Hâc Mehmed Sadık Efendi b. el-Hâc Mehmed Derviş meclis-i şer‘-i münîrde müderrisîn-i kirâmdan derûn-ı arzuhâlde mezkûrü’l-ism Nuri Beyefendi b. Mehmed Emin Efendi mahzarında mûmâ-ileyh Nuri Beyefendi zimmetinde bundan akdem yedimden ve malımdan iştirâ ve kabz eylediği top ve fiyâtı beynimizde ma‘lûm akmişe semenlerinden bâ-temessük iki yüz elli guruş alacak hakkım olmağla meblağ-ı merkūmu efendi-yi mûmâ-ileyhden taleb ederim deyü da‘vâ eylediğimde ol dahi cevâbında deyn-i meblağ-ı merkūmu ikrâr ü i‘tirâf edip lâkin hâlen ve def‘aten edâya iktidârım olmamağla işbu târih-i i‘lâmdan altmış bir gün tamamında tamamen edâ ederim, mümâtale ve ta‘allül etmem deyü ber-vech-i âtî tecîle tâlib olduğunda beynimizde vech-i meşrûh üzere altmış bir gün tamamında bana tamamen edâ ve teslîm etmek üzere rızâmla tecîl eyledim dediğini mûmâ-ileyh Nuri Beyefendi tasdîk ve meblağ-ı mezkûr iki yüz elli beş guruşu ecel-i merkūm hulûlünde müdde‘î-i mezbûra edâ ve teslîme müte‘ahhid olduğu İstanbul Mahkemesi’nden huzûr-ı âlîlerine i‘lâm olundu. Fî 10 Muharrem sene 1223.