İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 404 Hüküm no: 390 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divan kâtiplerinden Ahmed Rıza Efendi ve Osman Efendi’nin ortaklaşa kullandıkları vakıf menzil ve arsasının aralarında taksim olunması Uzunçarşı’da menzil keşfi, Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi Hâssa mi‘mârı hulefâsından Ali Rıza Bey ve Mehmed Halîfeler ile nezâret-i dâ‘îlerinde âsûde evkāfdan merhûm Dülgerzâde Hoca Şemseddin Vakfı musakkafâtından İstanbul’da Uzunçarşı başında Samanviran mahallesinde vâki‘ sâhibey-i arzuhâl Hâcegân-ı Dîvân-ı hümâyûn’dan Ahmed Rıza Efendi b. el-Hâc Mehmed ve el-Hâc Osman Efendi b. Abdullah bi’l-icâreteyn mutasarrıf oldukları zikri âtî menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde mûmâ-ileyh Ahmed Rıza Efendi meclis-i ma‘kūd-ı mezkûrda mezbûr Osman Efendi mahzarında vakf-ı mezbûr mütevellîsi Mehmed Said Efendi b. el-Hâc Mehmed hâzır olduğu hâlde işbu derûnunda akd-i meclis-i şer‘-i âlî olunan bir tarafdan vakf-ı mezbûrdan benim tasarrufumda olan âhar menzil ve bir tarafdan ba‘zan Boncukçu Hanı ve ba‘zan Çörekçi Fırını ve bir tarafdan tarîk-i âmda kâin dükkânlar havası ve bir tarafdan tarîk-i hâs ile mahdûd mi‘mârân-ı mezbûrânın misâhaları üzere bi-hesâbı terbî‘î iki yüz kırk bir zirâ‘ on bir parmak arsa üzerinde mebnâ fevkānî bir bâb oda ve bir sofa ve kenîf ve âbdesthâne ve tahtânî bir bâb oda ve dehliz ve nerdubân ve matbah ve bahçede bir zîr-i zemîn mahzen ve bi’r-i mâ ve tarîk-i âm tarafından altı bâb dükkânların havası ve sokak kapısını müştemil beher şehr kırk beşer akçe icâre-i müecceleli bir bâb menzilin nısf-ı şâyi‘i benim ve nısf-ı şâyi‘-i âharı mezbûr Osman Efendi’nin bi’l-icâreteyn taht-ı tasarruflarımızda olup ve kābil-i taksîm ve her birimizin hisselerimiz ile intifâ‘ mümkün olmağla her birimizin hisselerimiz ifrâz ve taksîm olunmak matlûbumdur deyü mütevellî-yi hâzır-ı mezbûrun re’yiyle eylediği da‘vâsını mezbûr Osman Efendi tasdîk ve ber-vech-i muharrer taksîme râzı olmağın mi‘mârân-ı mezbûrân dahi ba‘de’n-nazar misâha ve tahmîn ve takvîm eylediklerinde menzil-i mezkûrun bir tarafdan mûmâ-ileyh Ahmed Rıza Efendi ve bir tarafdan Boncukçu Hanı ve bir tarafdan mezbûr Osman Efendi’nin müfrez bahçe ve bir tarafdan tarîk-i hâs ile mahdûd terbî‘an yüz yirmi buçuk zirâ‘ beş buçuk parmak arsa üzerinde mebnâ fevkānî bir bâb oda ve bir sofa ve kenîf ve âbdesthâne ve tahtânî bir bâb oda ve dehliz ve nerdubân ve sülüsân matbah ocağı ve bir mikdâr sokak kapısını müştemil mahal mûmâ-ileyh Ahmed Rıza Efendi’nin nısf hissesine ve mâ‘adâ bir tarafdan mûmâ-ileyh Ahmed Rıza Efendi’ye ifrâz olunan mahal ve bir tarafdan mârrü’z-zikr Çörekçi fırını ve bir tarafdan tarîk-i âmda vâki‘ dükkân havası ve bir tarafdan tarîk-i hâslar ile mahdûd terbî‘an yüz yirmi buçuk zirâ‘ beş buçuk parmak arsa üzerinde sülüs matbah ocağı ve bir bi’r-i mâ ve bir zîr-i zemin kârgîr mahzen ve altı bâb dekâkin havası ve bir mikdâr sokak kapısını müştemil mahal mezbûr Osman Efendi’nin nısf hissesine ifrâz ve ta‘yîn ve tahsîs ve alâmât-ı fâsıla vaz‘ıyla imtiyâz olunup lâkin mûmâ-ileyh Ahmed Rıza Efendi’nin hisse-i mezkûresi için ifrâz olunan mahâll-i mahdûd-ı mezkûr mezbûr Osman Efendi’ye ifrâz olunan mahâlden mûmâ-ileyh Ahmed Rıza Efendi’nin mehûzu ziyâde olmağla kıymeti için yüz elli iki guruş vermek iktizâ etmekle meblağ-ı mezbûr mütâlebesinden mûmâ-ileyh Ahmed Rıza Efendi’nin zimmetini kabûlü hâvî ibrâ ve iskāt ve sâlifü’z-zikr Çörekçi fırını tarafına mürûr eden lağım beynlerinde müşterek olup ol-vechile her biri hisse-i müfrezelerini kabz ve kabûl ve istifâ-yı hak edip her biri hisse-i mezkûrelerine müte‘allika âmme-i da‘vâdan her biri âharın zimmetini ibrâ ve iskāt ve her biri ber-vech-i muharrer âharın ibrâsını kabûl ve mütevellî-yi hâzır-ı mezbûr dahi vech-i meşrûh üzere tasarruflarına izin verdiğini mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı [âlîlerine i‘lâm olundu]. Fî 15 Rebî‘ülâhir sene 1223.