İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 405 Hüküm no: 391 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer Efendi’nin, Teberdar Hasan Ağa ve Molla Ömer aleyhindeki Yağhane hissesi davasının reddedilmesi Kasımpaşa’da Bezir ve Şîruganhâne gediği Ma‘rûz Derûn-ı arzuhâlde mezkûrü’l-ism es-Seyyid Ömer Efendi b. es-Seyyid Ahmed nâm kimesne bi’l-ma‘iye rü’yete memûr nezâret-i hazret-i şeyhülislâmîde âsûde evkāf müfettişi eşrâf-ı kuzât-ı kirâmdan fazîletlü el-Hâc Mehmed Sadık Efendi ile Çarşamba günü arz odasında huzûr-ı hazret-i kāimmakām-ı âlî-makāmîde ma‘kūd meclis-i şer‘-i münîrde zikri âtî gedik âlât-ı lâzımesinin yüz yirmi sehm i‘tibârıyla seksen iki buçuk sehmine vaz‘-ı yedleri mütehakkık olan sâhibey-i arzuhâl Teberdâr Hasan Ağa b. Ahmed ve Molla Ömer b. Yusuf nâm kimesneler muvâcehelerinde mahrûse-i Galata’ya muzâfe kasaba-i Kasımpaşa’da Cumapazarı nâm mahâlde vâki‘ Çifte Yağhâne ta‘bîr olunur bir bâb bezir ve şîruganhâne derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla seksen iki buçuk sehmi es-Seyyid Molla Ali ve karındaşı es-Seyyid Molla İbrahim b. el-Hâc İsmail’in ve otuz yedi buçuk sehmi âharın yedlerinde iştirâken ve şâyi‘an mülk ve hakları iken mezbûr es-Seyyid Molla Ali bin iki yüz dokuz senesi Şevvâli’l-mükerremi gurresinde âlât-ı lâzıme-i muharrere-i mezkûrede ber-i‘tibâr-ı merkūm mâlik olduğu kırk bir sehm bir pul hissesinin yirmi iki buçuk sehmini üç yüz guruş semen-i medfû‘ ve makbûza bana bey‘ ve temlik ve mezbûr es-Seyyid Molla İbrahim dahi kezâlik mâlik olduğu kırk bir sehm bir pul hissesinin on bir sehm bir pul hissesini âhara bey‘ ve mâ‘adâ otuz sehmi yedinde iken fevt olup evlâd-ı sıgārına mevrûs olmağla ben dahi evlâd-ı sıgārının vasîsi olmamla ol-vechile âlât-ı lâzıme-i ma‘lûmenin yirmi iki buçuk sehmini bi’l-asâle ve otuz sekiz sehmini bi’l-vesâye taleb ederim deyü ba‘de’d-da‘vâ ve’l-istintâk mezbûr Hasan Ağa cevâbında işbu yedimde olup bin iki yüz dokuz senesi Muharrem’inin sekizinci günü târihiyle müverraha Mahmudpaşa mahkemesi sicillâtından muhrec bir kıt‘a hüccet-i şer‘iye nâtıka olduğu üzere müteveffâ-yı mezbûr es-Seyyid Molla İbrahim hayatında âlât-ı lâzıme-i ma‘lûmede ber-i‘tibâr-ı merkūm mâlik olduğu kırk bir sehm bir pul hissesini yedi yüz altmış guruş semen-i medfû‘ ve makbûza bana bey‘ ü temlik ve teslîm, ben dahi ba‘de’l-iştirâ [54b] ve’t-temellük ve’t-tesellüm bey‘-i mezkûrun tağrîr ve gabnine müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt etmiş idik deyüp ve merkūm Molla Ömer dahi kezâlik işbu yedimde olup bin iki yüz sekiz senesi Zilka‘desinin on birinci günü târihiyle müverraha bir kıt‘a hüccet-i şer‘iye mantûkunca mezbûr es-Seyyid Molla Ali mâlik olduğu kırk bir sehm bir pul hissesini yedi yüz elli guruş semen-i makbûza Molla Salih Yazıcı b. el-Hâc Osman’a bey‘ ve temlik ve teslîm, ol dahi iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika âmme-i de‘âvîden her biri âharın zimmetini kabûlü hâvî ibrâ ve iskāt eylediklerinde mezbûr Molla Salih Yazıcı dahi iki yüz dokuz senesi Zilka‘desi’nin yirmi birinci günü sekiz yüz on sekiz guruş semen-i medfû‘ ve makbûza bana bey‘ ü temlik ve teslîm, ben dahi ba‘de’l-iştirâ ve’t-temellük ve’t-tesellüm bey‘-i mezkûrun tağrîr ve gabnine müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt etmiş idik deyü mazmûnları min-külli’l-vücûh takrîrlerine mutâbık mümzâ ve mahtûm ibrâz eyledikleri üç kıt‘a hüccet-i şer‘iyenin mazmûnunu ve Yusuf b. Mehmed nâm kimesneler şehâdetleriyle bi’l-muvâcehe vech-i şer‘î üzere isbât etdiklerinden sonra mezbûr es-Seyyid Ömer Efendi husûs-ı mezkûru dahi bi-tamamihi tâyi‘an ve kat‘iyyen ikrâr ü i‘tirâf etmeğin mûcebince müdde‘î-i mezbûr da‘vâ-yı mezkûresiyle mezbûrân Hasan Ağa ve Molla Ömer’den her birine bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 17 Ca sene 1223.