İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 407 Hüküm no: 392 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Abdülkerim Keşfi Efendi ile Şeyh Seyyid Mehmed Muhyiddin Efendi’nin Bebek’te tasarruflarında olan salhaneyi paylaşmaları İstinye’ye tâbi‘ Bebek karyesinde Salhâne keşfi Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi Hâssa mi‘mârı hulefâsından Ali Rıza Bey ve Mehmed Halîfeler ile mahrûse-i Galata’ya muzâfe İstinye nâhiyesine tâbi‘ Bebek karyesinde vâki‘ bir bâb salhâneye varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde sâhib-i arzuhâl es-Seyyid Mehmed Abdülkerim Keşfî Efendi b. es-Seyyid el-Hâc Sırrı Mehmed Emin Efendi meclis-i ma‘kūd-ı mezkûrda derûn-ı arzuhâlde mezkûr eş-Şeyh es-Seyyid Mehmed Muhyiddin Efendi mahzarında işbu derûnunda akd-i meclis-i şer‘ olunan bir tarafdan Ser-etibbâ-yı hâssa müteveffâ Numan Efendi veresesi salhânesi ve bir tarafdan leb-i deryâ ve bir tarafdan Nurullah Efendi Vakfı’ndan mezbûr es-Seyyid Mehmed Muhyiddin Efendi tasarrufunda olan salhâne ve bir tarafdan tarîk-i âm ile mahdûd verâsında kâin bir tarafdan mezbûr tabîb-i hâssa veresesi ve bir tarafdan intihâ-yı cebel ve bir tarafdan yine Nurullah Efendi Vakfı’ndan salhâne ile mahdûd hâriciyede bir köşk ve ittisâlinde bir kahve odası ve dîvânhâne ve tahtânî bir bâb oda ve bir kenîf ve dâhiliyede fevkānî iki bâb oda ve bir sofa ve dîvânhâne ve kenîf ve tahtânî bir matbah ve bi’r-i mâ ve iki kenîfi müştemil eşcâr-ı müsmire ve gayr-ı müsmireli bahçe ve bahçede bir oda kırk sehm i‘tibârıyla yirmi sekiz sehm hissesi bâ-hüccet-i şer‘iye benim şirâen yedimde mülküm ve yirmi sehm hissesi Nurullah Efendi Vakfı’ndan mezbûr es-Seyyid Mehmed Muhyiddin Efendi’nin bi’l-icâreteyn tasarrufunda olmağla benim mârrü’z-zikr mülk olan yirmisekiz sehm hisse-i şâyi‘am ifrâz ve alâmât-ı fâsıla vaz‘ıyla imtiyâz olunmak matlûbumdur dedikde mezbûr es-Seyyid Mehmed Muhyiddin Efendi dahi tasdîk ve ber-vech-i muharrer ifrâz olunmağa râzı ve vakf-ı mezbûr mütevellîsi Şerife Nesibe Hanım bt. es-Seyyid Mehmed Muhyiddin Efendi’nin zevci ve tarafından mürsel vekîl-i şer‘îsi Abdurrahman Efendi dahi re’y etmeğin mi‘mârân-ı mezbûrân dahi ba‘de’n-nazar misâha eylediklerinde ber-mûceb-i hüccet-i şer‘iye deryâ cânibinde kâin bir tarafdan mezbûr tabîb-i hâssa veresesi salhânesi ve bir tarafdan tarîk-i âm ve bir tarafdan mezbûr es-Seyyid Mehmed Muhyiddin Efendi’nin Nurullah Efendi Vakfı’ndan salhâne ve bir tarafdan leb-i deryâ ile mahdûd bir kayık çekilir kayıkhâneyi müştemil deryâ cânibi arzan yedi zirâ‘ on buçuk parmak ve tarîk-i âm tarafı altı zirâ‘ on beş parmak ve verâsında kâin bir tarafdan mezbûr tabîb-i hâssa veresesi salhânesi ve bir tarafdan intihâ-yı cebel ve bir tarafdan mezbûr es-Seyyid Mehmed Muhyiddin Efendi tasarrufunda olan Nurullah Efendi Vakfı’ndan mahal ile mahdûd dâhiliyede fevkānî bir bâb oda ve dîvânhâne ve kenîf ve bir aralık oda ve bir mâbeyn odası ve sülüsân sofa ve tahtânî iki kenîf ve orta kapısını müştemil mahâllin tarîk-i âm tarafı dokuz zirâ‘ on dokuz parmak ve verâda bağ tarafında sed cânibi arzan on zirâ‘ beş parmak ebniyeli ve bahçe mahâlli mezbûr es-Seyyid Mehmed Abdülkerim Keşfî Efendi’nin mülkü olup ber-i‘tibâr merkūm yirmi sekiz sehme isâbet etmekle mâ‘adâ tarîk-i âm verâsında kâin bir tarafdan mezbûr es-Seyyid Mehmed Abdülkerim Keşfî Efendi’nin mülk mahâlli ve bir tarafdan intihâ-yı cebel ve bir tarafdan yine Nurullah Efendi Vakfı’ndan mahal ile mahdûd fevkānî bir bâb oda ve bir bâb kahve odası ve sülüs sofa ve köşk ve tahtânî bir oda ve matbah ve bi’r-i mâyı müştemil mahâll-i mezbûr es-Seyyid Mehmed Muhyiddin Efendi’nin bi’l-icâreteyn tasarrufunda olan mahal olmağla her biri ifrâz ve alâmât-ı fâsıla vaz‘ıyla imtiyâz olunup ol-vechile her biri tasarruflarında olan mahalleri kabz ve âharın hissesinde kat‘a alâkası kalmadığını tasdîk ve bu vechile kat‘-ı nizâ‘ eylediklerini mevlana-yı mezbûr mahâllinde ketb ü tahrîr [ve] ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 6 min-Cemâziyelevvel sene 1223.