İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 408 Hüküm no: 393 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han’ın Beylerbeyi ve Emirgan’da inşa ettiği camiler evkafından 4 adet fırancalacı fırınına ruhsat verilmesi 4 aded fırın güşâdı Ma‘rûz “Fırın-ı mezbûr küşâdıyla kemâ-fi’s-sâbık francıla i‘mâl eylemesine izin ve ruhsat verilmiş olmağla lâzım gelenlere tenbîh ve muktezâsını i‘lâm eyleyesin deyü sâdır olan emr-i âlîlerine imtisâlen bundan akdem İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i hazret-i şehin-şâhî bi’l-külliye sedd ü bend ve hilâfına ruhsat verilmeyeceği işbu derkenârdan müstebân iken bundan mukaddemce cennet-mekân firdevs-âşiyân Sultan Abdülhamid Han-ı Gāzi -aleyhi’r-rahmetü ve’l-gufrân- hazretlerinin Beylerbeyi ve Mîrgünoğlu nâm mahallerde müceddeden inşâ buyurdukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve mehd-i ulyâ-yı saltanat devletlü ismetlü efendimiz hazretlerinin Gümrükçü Çiftliği derûnunda kâin bir aded ve Çelebi Hasan Paşa Vakfı’ndan Kumkapı hâricinde vâki‘ İstefan ve Ohannes ve Haçador nâm zimmîlerin mutasarrıf oldukları bir aded francalacı fırınları ki cem‘an dört aded fırınlar sâire makīs olmayıp evkāf-ı şerîfe-i mezkûreden olmalarıyla sâire sirâyet etmemek ve bir vakitde emsâl olarak kaydı derkenâr olmamak şartıyla dört aded fırınların küşâdıyla on bir adede iblâğı husûsuna irâde-i seniyye-i kātı‘a-i cihân-dârî ta‘alluk etmekle ancak dört aded francalacı fırınlarının küşâdını ruhsatı hâvî emr-i âlî-şân mûcebince on bir aded francalacı fırınlarından mâ‘adâ bir mahâlde fırın küşad ve fırancala tabh ve i‘mâl ve bey‘ine ruhsat verilmeye deyü musarrah olmağla istid‘â olunan fırının küşâdı husûsu evvelâ hâmiş-i arzuhâle derkenâr olunan emr-i âlîden mu‘ahhar hatt-ı hümâyûn-ı şevket-makrûn ile mu‘anven sâdır olan emr-i âlî-şân kuyûdâtına ba‘de’n-nazar küşâdı ancak irâde-i seniyye-i kātı‘a-i hazret-i cihân-dârîye mütevakkıf olur mevâddan olduğu İstanbul Mahkemesi’nden huzûr-ı âlîlerine i‘lâm olundu. Fî 24 min-Cemâziyelevvel sene 1223. Bâ-sah Havâle olunan emir sûreti İstanbul kādısı fazîletlü Efendi, Fırın-ı mezbûr küşâdıyla kemâ-fi’s-sâbık fırancala i‘mâl eylemesine izin ve ruhsat verilmiş olmağla lâzım gelenlere tenbîh ve muktezâsını i‘lâm eyleyesin deyü fî 23 Ca sene 1223. Bâ-sah, İ‘lâm üzerine sudûr eden emir Tavukpazarı’nda kâin işbu fırının küşâdına irâde-i seniyye müte‘allik olmağla sâire sirâyet etmemek şartıyla kemâ-fi’s-sâbık fırancala i‘mâl olunmak üzere küşâd olunmak deyü fî 3 B sene 1223.