İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 409 Hüküm no: 394 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe ile Hasan Beşe’nin helvacı dükkânını nöbetleşe kullanmaları Galata’da Helvacı gediği, Ma‘rûz Derûn-ı arzuhâlde mezkûrü’l-ism helvacı es-Seyyid Ali Beşe b. Hasan nâm kimesne evvelâ Çarşamba günü Dîvân-ı âlîde ve ba‘dehû du‘âhânemizde ma‘kūd meclis-i şer‘-i münîrde müteveffâ Delimahmudoğlu İbrahim b. Hasan’ın sulbî kebîr oğlu sâhib-i arzuhâl Hasan Beşe nâm kimesne mahzarında Âsitâne-i aliyye ve Bilâd-ı selâse’de vâki‘ helvacı esnâfının kethudâsı Mehmed Usta ve mütevellîsi İsmail Usta ve ihtiyârlarından Kapan-ı dakīkli Hüseyin Usta ve Mercanlı Memiş Usta ve Dikiltaşlı Ali Usta ve Nişâncılı Hüseyin Usta ve Balatlı Abdullah Usta ve Karamanlı es-Seyyid Ali Usta ve Odunkapılı Alemdar Ahmed Usta ve Kasımpaşalı Mehmed Usta ve Mustafa Usta ve sâir bi’l-cümle helvacı esnâfı hâzır oldukları hâlde mahrûse-i Galata’da Kemankeş Karamustafapaşa mahallesinde Karaköy Hamamı karşısında kâin ashâb-ı hayrâtdan İmâm-ı sultânî merhûm Bektaş Efendi Vakfı musakkafâtından beher şehr otuz beş akçe icâre-i müecceleli ma‘lûmü’l-hudûd bir bâb helvacı dükkânının sülüsânı benim ve sülüsü mezbûr Hasan Beşe’nin bi’l-icâreteyn bâ-temessük-i mütevellî iştirâken taht-ı tasarrufumuzda ve derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla elli yedi sehm-i şâyi‘i bâ-hücec-i şer‘iye şirâen benim ve altmış üç sehm-i şâyi‘i merkūm Hasan Beşe’nin irsen yedimizde iştirâken ve şâyi‘an mülk ve hakkımız iken dükkân-ı mezkûr derûnunda mevcûde âlât-ı lâzıme bundan akdem bi-kazâillâhi te‘âlâ vukū‘ bulan harîkde muhterik ve arsası sırfe kalıp ba‘dehû ben dükkân-ı mezkûru mezbûrun emriyle malımdan bin beşyüz guruş harc ü sarfla müceddeden binâ ve inşâ ve helvacı gediği ta‘bîr olunur mermer taş ve kazgan ve sâir bâ-defter-i müfredât âlât-ı lâzıme-i ma‘lûmeye dahi kezâlik malımdan beş yüz elli dokuz guruş harc ü sarfla dükkân-ı mezkûr derûnuna vaz‘ etmemle ol-vechile dükkân-ı mezkûra masrûfum olan meblağ-ı merkūm bin beş yüz guruşdan mezbûr Hasan Beşe’nin sülüs hissesine isâbet eden beş yüz guruş derûnunda mevcûd gedik âlâtı lâzıme-i ma‘lûmesine masrûfum olan meblağ-ı merkūm beş yüz elli dokuz guruşdan kezâlik mezbûrun ber-i‘tibâr-ı merkūm altmış üç sehm hissesine isâbet eden iki yüz doksan üç guruş on dokuz para ki cem‘an yedi yüz doksan üç guruş on dokuz parayı mezbûr Hasan Beşe’den bi’l-murâca‘a taleb ederim deyü tasaddî eylediğim da‘vâ-yı mezkûremden mezbûr Hasan Beşe ile bi’t-tav‘ ve’r-rızâ beş yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ yedi yüz doksan üç guruş on dokuz paraya varınca ziyâdesi olan iki yüz doksan üç guruş on dokuz paraya ve bi’l-cümle husûs-ı mezkûra ve işbu târihe gelince sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ-yı âmm-ı kâtı‘u’n-nizâ‘ ve iskāt-ı tamm-ı râfi‘ü’l-hisâm ile ibrâ ve iskāt ve her birimiz ber-vech-i meşrûh âharın ibrâsını kabûl eyledik dedikde mukırr-ı müdde‘î-i mezbûr es-Seyyid Ali Beşe’nin bi’l-cümle takrîr-i meşrûhunu merkūm Hasan Beşe tahkīk ve tasdîk ve ber-minvâl-i muharrer kabûlü hâvî ibrâ eylediğini ve ibrâdan müstesnâ bedel-i sulh-ı mezkûr beş yüz guruş zimmetinde müdde‘î-i mezbûra sahîhan deyni olduğunu bi-tamamihi tâyi‘an ve kat‘iyyen ikrâr ü i‘tirâf etmeğin alâ-mûcebi i‘tirâfihî bedel-i sulh-ı mezkûr beş yüz guruşun müdde‘î-i mezbûra edâ ve teslîmiyle merkūm Hasan Beşe ba‘de’l-ilzâm mezbûr Hasan Beşe meclis-i şer‘de merkūm es-Seyyid Ali Beşe muvâcehesinde dükkân-ı mezkûrda merkūm es-Seyyid Ali Beşe müddet-i vâfire müstakılleten ve derûnunda mevcûde gedik âlât-ı lâzımesini zabt ve tasarruf etmekle ba‘de’l-yevm dükkân-ı mezkûrun kirâ-yı kadîmi ber-mûceb-i şurût-ı nizâm-ı esnâf mâh be-mâh ba‘de’l-edâ ancak mu‘teber olan derûnunda mevcûde gedik âlât-ı lâzımeyi muhâyât tarîkiyle evvelâ on bir ay on iki gün merkūm es-Seyyid Ali Beşe ve ba‘dehû bir sene on sekiz gün ben zabt ve tasarruf etmek üzere mezbûr es-Seyyid Ali Beşe’ye tenbîh olunmak matlûbumdur dedikde, ol dahi husûs-ı mezkûru tasdîk ve vech-i meşrûh üzere muhâyât tarîkiyle zabt ve tasarrufa râzı olup bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 24 Ca sene 1223.