İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 411 Hüküm no: 395 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın Dikicibaşı esnafına kethuda tayin olunması Dikicibaşı nasbı Ma‘rûz Âsitâne-i sa‘âdet ve tevâbi‘i olan Bilâd-ı selâse’de mevcûd bi’l-cümle haffâf esnâfının Başkethudâsı el-Hâc İbrahim Ağa ve Çedikçiler Kethudâsı Hasan Ağa ve Başyiğitbaşı es-Seyyid Ömer Ağa ve Mestçiler Yiğitbaşısı Ahmed Ağa ve Pabûşçular Yiğitbaşı es-Seyyid Ebûbekir Ağa ve Tâcirler Kethudâsı İsmail Ağa ve dikici esnâfından Ahmed Ağa ve Mahmud Ağa ve İbiş Ağa ve diğer İbiş Ağa ve Hasan Ağa ve es-Seyyid İbrahim Ağa ve Süleyman Ağa ve diğer Ahmed Ağa ve Halil Ağa ve Mehmed Ağa ve âhar Ahmed Ağa ve Mustafa Ağa ve İbrahim Ağa ve es-Seyyid Mehmed Ağa ve Hüseyin Ağa ve âhar Ahmed Ağa ve es-Seyyid Hasan ile re‘âyâ tâifesinden köşe ustaları ta‘bîr olunur Şehzâdebaşı köşe ustası Vartan ve Çatal Hanlı Agob ve Mercanlı Ohannes ve Vartan ve Alipaşa Hanlı Mardıros ve Sultan Odalarlı Serkiz ve Karamanlı Serkiz ve sâir Müslim ve zimmîler meclis-i şer‘-i münîrde bâ‘isü’l-i‘lâm es-Seyyid el-Hâc Osman Ağa b. Ahmed muvâcehesinde her biri takrîr-i kelâm edip mukaddemâ bâ-berât-ı âlî dikicibaşımız olan Kantarcıoğlu İbrahim b. Mehmed nâm kimesne bir müddetden beri dikicibaşı olup ba‘zı cünhasına mebnî taraf-ı Devlet-i aliyye’den nefy ü iclâ olunmağla ol-vechile umûru mu‘attal ve nizâm ve intizâmımız muhtel ve müşevveş olmasını mûcib olmağla yerine cümlemizin müntahab ve muhtârı olan işbu mezbûr es-Seyyid el-Hâc Osman Ağa hıref ve âdet-i esnâfımıza ârif ve şurût-ı nizâmımıza vâkıf ve her vechile dikicibaşılık-ı mezkûr uhdesinden gelmeğe kādir emîn ve müstakīm olduğu indimizde zâhir olmağla mezbûr es-Seyyid el-Hâc Osman Ağa dikicibaşı nasb ü ta‘yîn olunması matlûbumuzdur deyü her biri istid‘â eylediklerinde mezbûr es-Seyyid el-Hâc Osman Ağa kıbel-i şer‘den dikicibaşı nasb ü ta‘yîn olundukda ol dahi kabûl ve hizmet-i lâzımesini kemâ-yenbagī rü’yet ve edâya ba‘de’t-ta‘ahhüd dikicibaşılık-ı mezkûr mezbûr İbrahim’in ref‘inden mezbûr es-Seyyid el-Hâc Osman Ağa üzerine tevcîh ve yedine berât-ı şerîf-i âlî-şân sadaka ve ihsân buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 21 Ca sene 1223.