İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 412 Hüküm no: 396 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Kostanti’nin Galata’da Yeşil Direkli Hamam’ın tamirinden dolayı Oğuzoğlu Mehmed Ağa aleyhindeki alacak talebinde anlaşma sağlanması Galata’da Yeşil Direkli Hamam Ma‘rûz Mübârek rikâb-ı kamer-tâb-ı hüsrevânîye takdîm-i arzuhâl eden tüccâr kalfalarından Yani v. Kostanti nâm zimmî meclis-i şer‘-i münîrde hâssa hasekilerinden derûn-ı arzuhâlde mezkûrü’l-ism Oğuzoğlu Mehmed Ağa b. el-Hâc İbrahim nâm kimesne muvâcehesinde nezâret-i hazret-i Sadâret-penâhîde âsûde evkāfdan merhûm İbrahim Hanzâde Şehîd Mehmed Paşa Vakfı musakkafâtından mahrûse-i Galata’da Azabkapısı dâhilinde Çeşme Meydanı nâm mahâlde kâin Yeşil Direkli Hamam demekle ma‘rûf çifte hamamın yirmi sehm i‘tibârıyla altışar buçuk sehmden on üç sehmi gāibetân ani’l-meclis Emine ve Esma hanımların ve yedi sehmi işbu mezbûr Mehmed Ağa’nın iştirâken ve şâyi‘an bâ-temessük-i mütevellî bi’l-icâreteyn taht-ı tasarruflarında iken hamam-ı mezkûr bundan akdem bi-kazâillâhi te‘âlâ vukū‘ bulan harîkde muhterik ve arsası sırfe kalıp ba‘dehû ben hamam-ı mezkûru mutasarrıfları merkūmûnun bi-şarti’r-rücû‘ emirleriyle kendi malımdan müceddeden binâ ve inşâ ve kable’t-tekmîl mezbûrûnun taleb ve iltimâslarıyla mütevellîsi el-Hâc Halil Bey hâzır olduğu hâlde ma‘rifet-i şer‘ ve mi‘mâr ağa ma‘rifetiyle hamam-ı mezkûr keşf ü mu‘âyene ve misâha ve vaz‘-ı fiyâtla mesârifâtım hesâb ve işbu yedimde olan mümzâ ve mahtûm bir kıt‘a defter mantûkunca beş bin yedi yüz elli iki guruşa bâliğ olmağla meblağ-ı merkūmdan mezbûr Mehmed Ağa’nın ber-i‘tibâr-ı merkūm yedi sehm hissesine isâbet eden iki bin on üç guruş sekiz parayı mezbûr Mehmed Ağa’dan bi’l-mürâca‘a taleb ederim deyü tasaddî eylediğimiz da‘vâmdan bâ-vesâtet-i muslihîn mezbûr Mehmed Ağa ile bi’t-tav‘ ve’r-rızâ bin beş yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ iki bin on üç guruş sekiz paraya varınca ziyâdesi olan beş yüz on üç guruş sekiz paraya müte‘allika da‘vâdan mezbûr Mehmed Ağa’nın zimmetini ibrâ ve iskāt eylediğimde ol dahi ibrâ-yı mezkûrumu kabûl ve ibrâdan müstesnâ bedel-i sulh-ı mezkûr bin beş yüz guruşu işbu hâzır bi’l-meclis müdde‘iyân-ı [55b] Ahmed nâm kimesne üzerine havâle-i sahîha-i şer‘iye ile havâle ve herbirimiz havâle-i mezkûreyi kabûl eyledikden sonra meblağ-ı merkūm bin beş yüz guruşun bin dokuz guruşunu merkūm el-Hâc Mehmed Ağa’dan ahz ü kabz etmemle bâkīsi olan dört yüz doksan bir guruşu dahi hâzır-ı mezbûrdan taleb ederim dedikde mukırr-ı müdde‘î-i mesfûr Yani zimmînin bi’l-cümle takrîrini mezbûr Mehmed Ağa ve hâzır-ı merkūm el-Hâc Mehmed Ağa’dan her biri tahkīk ve tasdîk ve cihet-i havâle-i mezkûreden meblağ-ı bâkī-i merkūm dört yüz doksan bir guruş zimmetinde müdde‘î-i zimmî-i mersûma sahîhan deyni olduğunu hâzır-ı merkūm bi-tamamihi tâyi‘an ve kat‘iyyen ikrâr ü i‘tirâf etmeğin alâ- mûcibi i‘tirâfihî meblağ-ı merkūm dört yüz doksan bir guruşun müdde‘î-i mersûma edâsıyla mezbûr el-Hâc Mehmed Ağa ilzâm olunduğu İstanbul Mahkemesi’nden huzûr. Fî 20 Ca sene 1223