İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 413 Hüküm no: 397 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beşiktaş’ta Mehmed Kethuda Vakfı’na ait olup Yahudilere mahsus olan selhhanenin yerinde keşfolunarak gedik hisselerinin hissedarlara paylaştırıldığı Ortaköy’de sel[h]hâne keşfi Ma‘rûz Sâdır olan fermân-ı âlîlerine imtisâlen kıbel-i şer‘den Mürsel keşif nâibimiz Merhabâzâde Mahmud Efendi ve bi’l-ma‘iye rü’yete memûr Haremeyn-i şerîfeyn müderrisîn-i kirâm-ı zevi’l-ihtirâmdan fazîletlü Mehmed Fikri Efendi tarafından mürsel Kâtib es-Seyyid Hüseyin Efendi hâssa mi‘mârı hulefâsından es-Seyyid Mustafa ve Selim halîfeler ile mahrûse-i Galata’ya muzâfe kasaba-i Beşiktaş’a tâbi‘ Ortaköy’de vâki‘ Dârü’s-sa‘âdeti’ş-şerîfe ağası nezâretlerinde âsûde evkāfdan İbrahim Paşa Kethudâsı Mehmed Kethudâ Vakfı’ndan Yahûd tâifesine mahsûs sel[h]hâneye varıp cerîdede mazbûtü’l-esâmî Müslimîn huzûrlarında akd-i meclis-i kavîm eylediklerinde sâhib-i arzuhâl el-Hâc Abdülkerim Ağa b. Mehmed Tâhir meclis-i ma‘kūd-ı mezkûrda derûn-ı arzuhâlde mezkûr mârrü’l-beyân sel[h]hânenin beyne’l-esnâf gedik ta‘bîr olunur âlât-ı lâzıme-i ma‘lûmenin nısf hissesine iştirâken mutasarrıflar olup kendi nefsinden asîl şerîki ve karındaşı Davit tarafından vekîl-i şer‘îsi Aron veledey-i Mosi Yahûdî hâzır olduğu hâlde hâcegân-ı Dîvân-ı Hümâyûnumdan ve Mektûbî-i Hazret-i Sadr-ı âlî kalemi hulefâsından el-Hâc Mustafa Allâme Efendi ve hemşîreleri Âişe ve Fatma hanımlar ibney Telhîsî Mehmed Ağa taraflarından husûs-ı âti’l-beyânda vekîl olduğu zâtlarını ârifân Mustafa Ağa b. Osman ve diğer Mustafa Ağa b. Yusuf şehâdetleriyle sâbit olan el-Hâc İsmail Ağa b. Halil mahzarında vakf-ı mezbûr mütevellîsi Mehmed Bey b. İbrahim Bey tarafından mürsel vekîli Süleyman hâzır olduğu hâlde işbu derûnunda akd-i meclis-i şer‘-i şerîf olunan bir tarafdan vakf-ı mezbûrdan müvekkilûn-ı mezbûrûnun tasarruflarında olan mumhâne ve iki tarafdan tarîk-i âm ve bir tarafdan leb-i deryâ ile mahdûd fevkānî deryâ tarafında bir bâb oda ve önünde sofa ve bir mikdâr dehliz ve mumhâne duvarında vâki‘ bir kemerli ocak ve sokak kapısını müştemil beher şehr iki yüz on akçe icâre-i müeccelelü sagīr sel[h]hânesinin nısf-ı şâyi‘i benim ve nısf-ı şâyi‘-i âharı müvekkilûn-ı mezbûrûnun bi’l-icâreteyn taht-ı tasarruflarımızda olup ve kābil-i taksîm ve herbirimizin hisselerimiz ile intifâ‘ ve nısf hisse sagīr sel[h]hânesi olmağa salâhiyeti olup ve gedik mutasarrıfı mersûm dahi râzı olmağla herbirimizin hisselerimiz ifrâz olunmak matlûbumdur dedikde mütevellî vekîli hâzır-ı merkūm re’yiyle eylediği da‘vâsını vekîl-i mezbûr ile hâzır-ı mesfûr dahi tasdîk ve ber-vech-i muharrer taksîme râzı olmağın mi‘mârân-ı mezbûrân dahi ba‘de’n-nazar mesâha ve tahmîn ve takvîm eylediklerinde sel[h]hâne-i mezkûrun bir tarafdan müvekkilûn-ı mezbûrûnun vakf-ı mezbûrdan tasarruflarında olan mumhâne ve bir tarafdan tarîk-i âm ve bir tarafdan müvekkilûn-ı mezbûrûnun müfrez selhhâneleri ve bir tarafdan leb-i deryâ ile mahdûd tûlen tansîfen on dokuz zirâ‘ on beş parmak ve arzen altı zirâ‘ bir parmak terbî‘an yüz on sekiz zirâ‘ on üç parmak arsa üzerinde mebnî leb-i deryâ tarafında bir bâb oda ve önünde sofa ve bir mikdâr dehliz ve mumhâne duvarında vâki‘ bir kemerli ocak ve sokak kapısını müştemil mahâll-i mezbûr el-Hâc Abdülkerim Ağa’nın nısf hissesine ve mâ‘adâ bir tarafdan mezbûr el-Hâc Abdülkerim Ağa’ya ifrâz olunan mahal ve iki tarafdan tarîk-i âm ve bir tarafdan leb-i deryâ ile mahdûd tûlen on dokuz zirâ‘ beş parmak ve arzen tansîfen altı zirâ‘ beş parmak terbî‘an yüz on dokuz zirâ‘ altı parmak arsa üzerinde ancak bir mikdâr dehliz ebniyesini müştemil mahal müvekkilûn-ı mezbûrûn el-Hâc Mustafa Allâme Efendi ve Âişe ve Fatma hanımların hissesine ifrâz ve gedik mutasarrıfları hâzır-ı mesfûr dahi sel[h]hâne-i mezkûr derûnunda mevcûde gediği müvekkilûn-ı mezbûrûnun nısf hisselerine nakl ve nefs-i sel[h]hâne icâresi olmak üzere beher şehr on beşer guruş icâre tesmiyesiyle istîcârlarını bi’l-asâle ve bi’l-vekâle mukır olmağla ol-vechile ta‘yîn ü tahsîs ve alâmât-ı fâsıla vaz‘ıyla imtiyâz olunup lâkin mezbûr Abdülkerim Ağa’nın hisse-i mezkûresi’çün ifrâz olunan mahâll-i mahdûd-ı mezkûr müvekkilûn-ı mezbûrûna ifrâz olunan mahâlden mezbûr Abdülkerim Ağa’nın mehûzu olan ebniye ziyâde olmağla yüz guruş vermek iktizâ etmekle mezbûr Abdülkerim Ağa meblağ-ı merkūm yüz guruşu vekîl-i mezbûra def‘ ü teslîm ol dahi bi’l-vekâle ahz ü kabz edip ol-vechile herbiri hisse-i müfrezelerini kabz ve kabûl ve istifâ-yı hak edip herbiri bi’l-asâle ve bi’l-vekâle hisse-i mezkûrelerine müte‘allika âmme-i de‘âvî ve mutâlebâtdan herbiri ber-vech-i muharrer âharın zimmetini ibrâ ve iskāt ve herbiri ber-vech-i muharrer âharın ibrâsını kabûl ve mütevellî vekîli hâzır-ı mezbûr dahi vech-i meşrûh üzere tasarruflarına izin verdiğini mevlana-yı mezbûrân mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr. Fî 19 Ca sene 1223.