İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 415 Hüküm no: 398 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide bt. Ali’nin hissedarı olduğu İstavros köyündeki hamamdan yasal bir mazereti olmadan kiracısı İbrahim Ağa’yı çıkaramayacağı İstavros’da hamam Ma‘rûz Medîne-i Üsküdar’a muzâfe İstavros karyesinde vâki‘ bir bâb hamamın nısf hissesine mutasarrıfe olan sâhibe-i arzuhâl Hamide bt. Ali nâm hatun tarafından husûs-ı âti’l-beyânda vekîl olduğu zâtını ârifân İsmail Ağa b. el-Hâc Mehmed Sadık ve Mehmed Ağa b. Süleyman nâm kimesneler şehâdetleriyle sâbit olan Mehmed Sadık Ağa b. ( ) nâm kimesne meclis-i şer‘-i münîrde müvekkile-i mezbûrenin üvey vâlidesi ve hamam-ı mezkûrun nısf-ı şâyi‘-i âharına mutasarrıfe olan Saraylı Niyazi Kadın bt. Abdullah tarafından kezâlik husûs-ı âtîde vekîl olduğu zâtını ârifân Mehmed Emin Ağa b. Yahya ve Mehmed Beşe b. Mustafa nâm kimesneler şehâdetleriyle sâbit olan İbrahim Ağa b. Mehmed nâm kimesne ile karye-i mezbûre imâmı Mustafa Efendi ve müezzini Ali Efendi ve mütevellîsi es-Seyyid İbrahim Ağa ve ahâlisinden es-Seyyid Ali Ağa ve İbrahim Ağa ve İsmail Ağa ve Berber Mehmed Emin Ağa ve Numan Odabaşı ve Mahmud Beşe ve sâir bi’l-cümle karye-i mezbûre ahâlileri hâzır oldukları hâlde hamam-ı mezkûrun müsâneheten müsteciri derûn-ı arzuhâlde mezkûrü’l-ism es-Seyyid İbrahim Ağa b. es-Seyyid Feyzullah nâm kimesne muvâcehesinde müvekkilem mezbûre Hamide Hatun ile üvey vâlidesi müvekkile-i mezbûre Niyazi Kadın ber-vech-i muharrer iştirâken mutasarrıfe oldukları hamam-ı mezkûru bin iki yüz yirmi iki senesinden şehr-i Ramazani’l-mübâreki gurresinden yirmi üç senesi Şa‘bâni’l-mu‘azzamı gāyetine gelince bir seneliğini mezbûr es-Seyyid İbrahim Ağa’ya yüz yirmi guruşa müsâneheten îcâr ve teslîm eylediklerinde ol dahi ber-vech-i muharrer istîcâr ve tesellüm ve kabûl ve hâlâ derûnunda sâkin olup lâkin müvekkilem mezbûre Hamide Hatun hamam-ı mezkûrda olan nısf hissesinde târih-i i‘lâm şehri gāyetinde fesh-i akd-i icâre etmekle hamam-ı mezkûrdan hurûc birle müvekkilem mezbûre ile üvey vâlidesi müvekkile-i mezbûre Niyazi Kadın’a teslîme merkūm es-Seyyid İbrahim Ağa’ya tenbîh olunmak bi’l-vekâle matlûbumdur dedikde evvelâ hâzır-ı mezbûr İbrahim Ağa istintâk olundukda cevâbında müvekkilem mezbûre Niyazi Kadın hamam-ı mezkûru rebîbesi müvekkile-i mezbûre Hamide Hatun ile vech-i meşrûh üzere müsâneheten îcâr edip ve ahâli-i karye hâzırûn-ı merkūmûn dahi işbu müstecir-i mezbûr es-Seyyid İbrahim Ağa’dan cümlesi hoşnûd ve râzılar olup kat‘a özr-i şer‘î [56a] olmamağla fesh-i icâreye müvekkilem mezbûrenin rızâsı yokdur deyü ahâli-i karye hâzırûn-ı mezbûrûnun tasdîkleriyle eylediği takrîrini müdde‘î-i vekîl-i merkūm Mehmed Sadık Ağa ikrâr ü i‘tirâf ve ber-vech-i muharrer takrîr-i meşrûhu üzere müvekkiletân-ı mezbûretânın müsâneheten îcâr eylediklerini mukırr u mu‘terif iken özr-i şer‘î bulunmaksızın kable-tamami’l-müddet şer‘an fesh-i akd-i icâreye müvekkiletân-ı mezbûretân kādire olmamağla mûcebince müdde‘î-i vekîl-i mezbûr Mehmed Sadık Ağa müvekkilesi mezbûre Hamide Hatun’a izâfetle da‘vâ-yı mezkûresiyle müstecir-i merkūm es-Seyyid İbrahim Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 24 Ca sene 1223.