İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 416 Hüküm no: 399 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyon Serhalifesi Sadullah’ın Kasımpaşa’da has fırın açmasının padişahın iradesine bağlı olduğu Kasımpaşa’da hâs fırın küşâdı Ma‘rûz Fırın-ı mezkûrda hâs etmek tabh ve fürûhta izin ve ruhsat verilmek iktizâ edenlere tarafınızdan tenbîh ve i‘lâm eyleyesiz deyü sâdır olan emr-i âlîlerine imtisâlen bundan akdem İstanbul ve havâlîsinde mahâll-i ma‘lûmede yedi aded francalacı fırınları ibkā mâ‘adâ bâ-irâde-i hazret-i şehin-şâhî bi’l-külliye sedd ü bend ve hilâfına ruhsat verilmeyeceği müstebân iken bundan mukaddemce cennet-mekân firdevs-âşiyân Sultan Abdülhamid Han-ı Gāzi -aleyhi’r-rahmetü ve’l-gufrân- hazretlerinin Beylerbeyi ve Mîrgünoğlu nâm mahallerde müceddeden inşâ buyurdukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve mehd-i ulyâ-yı saltanat devletlü ismetlü efendimiz hazretlerinin Gümrükcü Çiftliği derûnunda kâin bir aded ve Çelebi Hasan Paşa Vakfı’ndan Kumkapı hâricinde vâki‘ İstefan ve Ohannes ve Haçador nâm zimmîlerin mutasarrıf oldukları bir aded francalacı fırınları ki cem‘an dört aded fırınlar sâire makīs olmayıp evkāf-ı şerîfe-i mezkûreden olmalarıyla sâire sirâyet etmemek ve bir vakitde emsâl olarak kaydı derkenâr olunmamak şartıyla dört aded fırınların küşâdıyla on bir adede iblâğı husûsuna irâde-i seniyye-i kātı‘a-i cihân-dârî ta‘alluk etmekle ancak dört aded francalacı fırınlarının küşâdını ruhsatı hâvî emr-i âlî-şân mûcebince on bir aded francalacı fırınlarından mâ‘adâ bir mahâlde fırın küşâd ve francala tabh ü i‘mâl ve bey‘ine ruhsat verilmeye deyü musarrah olmağla istid‘â olunan kasaba-i Kasımpaşa’da Yeniçeşme nâm mahâlde Ser-halîfe-i kalyon Sadullah nâm kullarının bundan akdem mutasarrıf olduğu bir bâb etmekci fırınında nân-ı hâs fırınının küşâdı husûsu kuyûdâtına ba‘de’n-nazar muktezâsı ancak irâde-i seniyye-i kātı‘a-i hazret-i cihân-dârîye mütevakkıf olur mevâddan olduğu İstanbul Mahkemesi’nden huzûr-ı âlîlerine i‘lâm olundu. Fî 23 Ca sene 1223.