İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 418 Hüküm no: 401 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sucuk ve pastırmacı esnafından olmayan Agop v. Kirkor’un sucuk ve pastırma imalinden men edildiği Basdırmacı esnâfından ihrâc Ma‘rûz Âsitâne-i aliyye’de vâki‘ sucukçu esnâfının kethudâsı el-Hâc Mehmed Ağa ve esnâfından es-Seyyid Mehmed Usta ve es-Seyyid İbrahim Usta ve diğer İbrahim Usta ve sâirleri meclis-i şer‘-i münîrde Basdırmacı Agop v. Kirkor nâm zimmî muvâcehesinde bizler sucuk ve basdırma i‘mâl ve ibâdullâha bey‘le melûf esnâfdan olup mersûm Agop zimmî esnâfımızdan olmadığından mâ‘adâ Ağakapısı kurbünde Soğancıbaşı virânesinde kâin basdırma i‘mâl ve çemen ile terbiye eden zimmîlerden dahi hâric olmağla âhar yerde bu esnâda Kesmekaya kurbünde vâki‘ bir bâb kârhâne ihdâs ve kalb basdırma i‘mâl eylediğinden mâ‘adâ vakitsiz sucuk i‘mâl edip âhara bey‘ ve iştirâ eden fukarânın yedinde vakitsiz olduğuna binâen ta‘affün etmekle ol-vechile ibâdullâhın mağbûn ve mutazarrır olmasına bâ‘is ve bizlerin nizâmımızın ihtilâline müeddî olmağla men‘ ü def‘ olunmak [56b] matlûbumuzdur dedikleri mersûm Agop zimmî dahi husûs-ı mezkûru tasdîk ve fîmâ-ba‘d san‘at-i mezkûreyi i‘mâl etmeyip kâr-ı âhara sülûke müte‘ahhid olduğu İstanbul Mahkemesi’nden huzûr-ı âlîlerine i‘lâm olundu. Fî 21 min-Ca sene 1223.