İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 420 Hüküm no: 403 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hatun’un Mehmed Kethuda ile yarıyarıya ortak satın aldıkları Yoros Nahiyesi’ne bağlı Kum köyündeki çiftlik arazisi Kum karyesinde çiftlik Ma‘rûz Derûn-ı i‘lâmda mezkûretü’l-ism mu‘arrefetü’z-zât Şerife Nefise Hatun bt. es-Seyyid Abdullah Çarşamba günü arz odasında huzûr-ı hazret-i kāimmakām-ı âlî-makāmîde ma‘kūd meclis-i şer‘-i münîrde kezâlik derûn-ı i‘lâmda mezkûrü’l-ism Mehmed Kethudâ b. Süleyman nâm kimesne muvâcehesinde zevcim olup verâseti benimle li-ebeveyn kız karındaşı diyâr-ı âharda sâkine Havva’ya ve li-ebeveyn ammi oğlu mezbûr Mehmed Kethudâ’ya ve sülüs vesâyâ-yı mu‘ayyene ve gayr-ı mu‘ayyenesine münhasıra olduğu hâlde bin iki yüz on yedi senesinde vefât eden Osman Ağa b. Abdullah’ın bi’l-cümle terekesi târih-i mezbûrda ma‘rifet-i şer‘le tahrîr ve sûk-ı sultânîde semen-i misilleriyle bey‘ olundukda müteveffâ-yı mezbûrun medîne-i Üsküdar’a muzâfe Yoros Nâhiyesi’ne tâbi‘ İrva Kal‘ası civârında Kum karyesinde kâin ma‘lûmü’l-hudûd ve’l-müştemilât bir kıt‘a çiftliğin mülkü ve hayvanât ve hubûbât ve mezrû‘ât ve eşcârı benimle mezbûr Mehmed Kethudâ’nın üzerimizde bi’l-münâsafe dört bin yüz on guruşda karâr ve ziyâde ile tâlib-i âharı zuhûr etmemekle çiftlik-i mezkûrun mülkü ve hayvanât ve hubûbât ve mezrû‘ât ve eşcârı ma‘rifet-i şer‘le meblağ-ı merkūm dört bin yüz on guruşa vech-i meşrûh üzere ben mezbûr Mehmed Kethudâ ile bi’l-münâsafe iştirâken iştirâ ve temellük ve tesellüm ve kabûl ve semen-i meblağ-ı merkūmu tamamen edâ ve teslîm ve müteveffâ-yı mezbûrun defter-i kassâmına idhâl olunup ol-vechile çiftlik-i mezkûrun mülkü ve hayvanât ve hubûbât ve mezrû‘ât ve eşcârı benimle mezbûr Mehmed Kethudâ’nın ale’l-iştirâki’s-seviyy [57a] yedimizde mülk ve hakkımız olup lâkin çiftlik-i mezkûra teba‘iyetle zirâ‘at ve harâset olunur herbiri lede’l-ahâli ve’l-cîrân ma‘lûmü’l-hudûd ve’l-kıt‘a tarlaların hakk-ı tapusu her ne kadar müteveffâ-yı mezbûrun kız karındaşı merkūme Havva’nın ise dahi mezbûre Havva yurdu üzerinde olmayıp diyâr-ı âharda ve tapuya tâlibe olmadığından mâ‘adâ zikr olunan tarlaları çiftlik-i mezkûra tâbi‘ ve çiftlikden ifrâz olunması hilâf-ı kānûn olduğu derkenârdan müstebân olmağla ben dahi arâzi-i merkūmenin nısfını benim üzerime ve nısf-ı âharını kendi üzerine tapu etdir her kaç guruş resm-i tapu verir isen makbûlümdür deyip ol dahi sâhib-i arz olan Hacı Ahmed oğlu Molla Mehmed’e beş yüz elli guruş resm-i tapu verip arâzi-i mezkûreyi müstakıl kendi üzerine tapulamağla meblağ-ı merkūmûn nısfı olan iki yüz yetmiş beş guruşu yedimden ahz birle nısf-ı arâzi-i mezkûreden keff-i yed ve bâ-ma‘rifet-i sâhib-i arz bana teslîme mezbûr Mehmed Kethudâ’ya tenbîh olunmak matlûbumdur deyü sâhib-i arz hâzır olduğu hâlde da‘vâ etdikde ol dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin re’y-i âlî ve kānûn-ı kadîm üzere meblağ-ı merkūm iki yüz yetmiş beş guruşu alıp nısf-ı arâzi-i mezkûreden keff-i yed ve müdde‘iye-i mezbûre Şerife Nefise Hatun’a teslîme mezbûr Mehmed Kethudâ’ya tenbîh ve nısf-ı arâzi-i mezkûrenin zabt ü tasarrufi’çün sâhib-i arz tarafından mezbûre Şerife Nefise Hatun yedine temessük i‘tâsı iktizâ eylediği İstanbul Mahkemesi’nden huzûr. Fî 25 Ca sene 1223.