İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 422 Hüküm no: 404 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bektaş Ağa’nın Süleyman Beşe aleyhine açtığı alacak davasında beş yüz kuruşa sulh olduğu Bi-hükmi’l-asâle ve’l-kefâle 500 guruşun edâsıyla ilzâm Ma‘rûz Sâhib-i arzuhâl Bektaş Ağa b. Ali nâm kimesne meclis-i şer‘-i münîrde habbâz tâifesinden derûn-ı arzuhâlde mezkûrü’l-ism Süleyman Beşe b. İbrahim nâm kimesne muvâcehesinde işbu yedimde olup bin iki yüz yirmi bir senesi şehr-i Rebî‘ülâhir’in gurresi târihiyle muvarrah bir kıt‘a temessük mantûkunca benim mezbûr Süleyman Beşe ile şerîki gāib ani’l-meclis Şa‘bân Beşe b. Abdullah zimmetlerinde herbiri âharın zimmetine lâzım gelen meblağına tarafeynden bi’l-emr ve’l-kabûl kefîl ve zâmin olarak mâlımdan ve yedimden bi’l-ma‘iye iktirâz ve kabz eyledikleri beş yüz guruş ve semeni târih-i mezkûrdan iki sene tamamına değin müeccel ve mev‘ûd kezâlik yedimden ve mâlımdan iştirâ ve kabz eyledikleri bir kitâb semeninden dahi yüz guruş ki ciheteyn-i mezkûreteynden cem‘an altı yüz guruş alacak hakkım olmağla meblağ-ı merkūmun kırk guruşunu mezbûr Süleyman Beşe bana edâ ve teslîm bâkīsi olan beş yüz altmış guruşu dahi mezbûrdan asâlet ve kefâletine binâen hâlâ taleb ederim deyü tasaddî eylediğim da‘vâmdan bâ-vesâtet-ı muslihîn mezbûr Süleyman Beşe ile bi’t-tav‘ ve’r-rızâ beş yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâya ve bi’l-cümle husûs-ı mezkûra müte‘allika âmme-i da‘vâdan mezbûr Süleyman Beşe ile şerîki gāib-i mezbûrun zimmetlerini kabûllerini hâvî ibrâ ve iskāt eyledim dediğini mezbûr Süleyman Beşe tasdîk ve ibrâdan müstesnâ bedel-i sulh-ı mezkûr beş yüz guruş zimmetinde müdde‘î-i mezbûr asâleten ve kefâleten sahîhan deyni olduğunu ikrâr u i‘tirâf etmeğin alâ mûcibi i‘tirâfihî bedel-i sulh-ı mezkûr beş yüz guruşun müdde‘î-i mezbûr Bektaş Ağa’ya bi-hükmi’l-asâle ve’l-kefâle edâ ve teslîmiyle merkūm Süleyman Beşe ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî 22 min-Cumâdelûlâ sene 1223.