İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 422 Hüküm no: 405 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Nikagos’un Serkiz v. Agop aleyhine açtığı alacak davasında seksen kuruşa sulh olduğu 80 guruş üzerine birbirlerini ibrâ Ma‘rûz Sâhibe-i arzuhâl şahsı mu‘arrefe Maryem bt. Nikagos nâm Nasrâniye meclis-i şer‘-i hatîrde derûn-ı arzuhâlde mersûmü’l-ism Serkiz v. Agop nâm zimmî muvâcehesinde ben târih-i i‘lâmdan bir sene mukaddem âhara bey‘ etmek için mâlımdan yüz guruş kıymetli bir elmas çiçek ve seksen guruş kıymetli bir elmas yüzüğümü mersûm Serkiz zimmî yedine teslîm ol dahi ahz ü kabz ve hâlâ yedinde bi-a‘yânihâ mevcûde olmağla zikr olunan çiçek ve yüzüğü bana teslîme mersûm Serkiz zimmîye tenbîh olunmak matlûbumdur deyü da‘vâ eylediğimde ol dahi cevâbında benim senin zimmetinde cihet-i karzdan yüz yirmi guruş alacak hakkım olmağla meblağ-ı merkūm mukābelesinde mârrü’l-beyân çiçek ve yüzüğü yedime rehin vaz‘ ve teslîm eylediğinden mâ‘adâ edâ-i deyn etmeksizin zikr olunan çiçek ve yüzüğü zevcin işbu hâzır bi’l-meclis Nikofor v. Artin zimmî yediyle bi-a‘yânihâ sana redd ü teslîm etmemle meblağ-ı merkūm yüz yirmi guruşu taleb ederim deyü benden da‘vâya tasaddî ve ol-vechile beynimizde ba‘de vukū‘i’l-münâza‘a bâ-vesâtet-i muslihîn beynimiz tevfîk ve ıslâh olunup ben ber-vech-i muharrer tasaddî eylediğim da‘vâ-yı mezkûrumdan mersûm Serkiz zimmî ile bi’t-tav‘ ve’r-rızâ seksen guruş üzerine ba‘de akdi’l-musâlaha ve’l-kabûl bi’l-cümle husûs-ı mezkûra ve zikri mürûr eden çiçek ve yüzüğün ziyâde kıymetlerine ve sâir cemî‘ hukūk-ı şer‘iyeye müte‘allika âmme-i de‘âvîden mersûm Serkiz zimmînin zimmetini ol dahi benden iddi‘â eylediği meblağ-ı merkūm yüz yirmi guruşa ve sâire müte‘allika âmme-i de‘âvîden benimle zevcim hâzır-ı mesfûr Nikofor zimmînin zimmetlerimizi herbirimiz ibrâ-i âmm-ı sahîh-i şer‘î ile ibrâ ve iskāt ve herbirimiz ber-vech-i meşrûh âharın ibrâsını kabûl eyledik dediğini mersûm Serkiz zimmî tasdîk ve ber-minvâl-i muharrer kabûlü hâvî ibrâ eylediğini ve ibrâdan müstesnâ bedel-i sulh-ı merkūm seksen guruş zimmetinde müdde‘iye-i mesfûre Maryem Nasrâniyeye deyni olduğunu bi-tamamihi tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihî bedel-i sulh-ı merkūm seksen guruşun müdde‘iye-i mersûmeye edâsıyla mesfûre Serkiz zimmî ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî 29 min-Cumâdelûlâ sene 1223.