İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 423 Hüküm no: 406 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzmit mum imalathanesinin tahsisi talebinin araştırılması gerektiği Şem‘hâne Ma‘rûz Kocaeli Sancağı’nda vâki‘ medîne-i İznikmid’de mîr-livâ hâssı mülhakātından nefs-i şehirde kâin bir bâb şem‘hâneyi ber-mûceb-i defter-i hâkānî zabt ve şem-i asel i‘mâl ve kadîmî üzere hâs tarafına edâ edip bu vechile kârhâneye mutasarrıf olan Minasfan zimmî hâlik olmağla şem‘hâne-i merkūmeyi oğlu Agop zimmî babası mesfûr intikālinden kendi ismine tasrîhan ve mahâll-i merkūmda ve havâlîsinde şem‘hâne-i mezkûreden mâ‘adâ kârhâne olmasın deyü emr-i âlî-şân istid‘â edip lâkin hâlik-i mesfûrun sulbî oğlu mersûm Agop zimmîden gayrı yok mudur ve şem‘-i aselin i‘mâli kârhâne-i merkūmeye kasr ve tahsîsi el-yevm cârî midir husûs-ı mezkûr mahâllinden isti‘lâma muhtâc olduğu İstanbul Mahkemesi’nden huzûr-ı âlîlerine i‘lâm olundu. Fî-gurreti Cumâdelâhire sene 1223.