İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 426 Hüküm no: 408 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asitane’deki bürüncekci esnafının uygunsuz hareketlerinden dolayı esnaflıktan çıkarılmasını talep ettikleri Yiğitbaşı Mikâil ve Aci Semaven ve Kör Abraham ile verdikleri teminat üzerine anlaşmaya vardıkları Bürüncekci esnâfına dâir Ma‘rûz Âsitâne-i aliyye’de vâki‘ bürüncekci esnâfının kethudâsı Mehmed Ağa ve yiğitbaşısı Halil Usta ve ihtiyâr ustalarından Mustafa ve Mehmed ve es-Seyyid Halil ve diğer Mustafa ve es-Seyyid Ali ve Süleyman ve es-Seyyid İbrahim ve diğer İbrahim ve âhar İbrahim ve Ahmed ve âhar Mustafa ve diğer Halil ve re‘âyâdan Yiğitbaşı Samatik ve Aci Mikâil ve Mesrob ve Nikagos ve Gabril ve Donik ve Ohannes ve Partam ve Melkon ve Toros ve diğer Gabril ve Karabet ve Bedros ve Ovannes ve diğer Ovannes ve Nikolaki ve Sandimos ve Ziron ve Avakim ve Kerope ve diğer Kerope ve Ağyad ve Kirkor ve diğer Kirkor ve Kigork ve sâir Müslim ve zimmîler meclis-i şer‘-i münîrde yine esnâf-ı merkūme ustalarından sâbıkā Yiğitbaşı Mikâil v. Ohannes ve Aci Semaven v. Bedros ve Kör Abraham v. Haçador nâm zimiler muvâcehelerinde mersûmûn Mikâil ve Aci Semaven ve Abraham zimmîler esnâfımızdan olup lâkin kendi hâllerinde ırzlarıyla mukayyed ve kâr ü kisbleriyle [58a] meşgūller olmayıp dâimâ nizâm-ı kadîmimizin mugāyiri nice harekât-ı nâ-bercâya ictisâr ve esnâfımız beyninde türlü türlü fesâdı mûcib hâlât-ı rediyeye ibtidâr ve şirâze-i nizâmımızın ihtilâline bâdî oldukları âşikâr olmağla zimmîyyûn-ı mersûmûnun bu makūle ihtilâl-i nizâm-ı kadîmi mûcib harekât-ı nâ-marzıyelerinden cümlemizin emn ü rahatımız meslûb olmağla kendilerden bir vechile hoşnûd ve râzı değilleriz deyü bundan akdem mersûmûnun sû’-i hâllerinden bahisle iştikâ ve esnâfdan hurûcunu iltimâs ve istid‘â etmişdik. El-hâletü hâzihî zimmîyyûn-ı mersûmûn fîmâ-ba‘d bu makūle mugāyir-i nizâm-ı kadîm hareket etmeyip herbirleri kendi kâr ü kisbleriyle meşgūl ve ırzlarıyla mukayyed olmağa ta‘ahhüd etmeleriyle biz dahi ber-vech-i meşrûh şikâyetlerimizi tehîr edip bu vechile kat‘-ı münâza‘a eyledikleri İstanbul Mahkemesi’nden huzûr. Fî 15 Rebî‘ülâhir sene 1223.