İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 428 Hüküm no: 411 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaptırdığı binanın yüksekliği ile Bosnevî Tezkireci Hüseyin Efendi Medresesi’nin dört adet odasının ışığını kestiği iddiasıyla Bıçakçı Ali Beşe aleyhine medrese sakinleri tarafından açılan davada iddianın doğru olmadığının anlaşıldığı Menzil keşfi Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi hâssa mi‘mârı hulefâsından es-Seyyid Mustafa ve Mehmed halîfeler ile İstanbul’da Baba Hasan Alemî mahallesinde vâki‘ nezâret-i dâ‘îlerinde âsûde evkāfdan Davud Ağa Vakfı’ndan bir bâb menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde menzil-i mezkûr verâsında kâin merhûm Bosnevî Tezkireci Hüseyin Efendi Medresesi sükkânından ve talebe-i ulûmdan ashâb-ı arzuhâl Molla Halil b. Hüseyin ve Molla Ali b. Mehmed ve es-Seyyid Molla Süleyman b. Ebîbekir ve Molla Ali b. Hüseyin nâm kimesneler meclis-i ma‘kūd-ı mezkûrda derûn-ı arzuhâlde mezkûrü’l-ism Bıçakcı Ali Beşe b. Mehmed mahzarında medrese-i mezkûre vakfının kāimmakām-ı mütevellîsi es-Seyyid İbrahim İffet Efendi tarafından mürsel vekîli Hasan Hüseyin Efendi ve mârrü’z-zikr Davud Ağa Vakfı’nın kāimmakām-ı mütevellîsi Süleyman Ağa b. İbrahim hâzır oldukları hâlde merkūm Bıçakcı Ali Beşe ber-vech-i muharrer mutasarrıf olduğu menzilini bu esnâda hedm ve müceddeden binâ eylediği ebniyesini dokuz zira terfi‘ ve ol-vechile bizim medrese-i mezkûrede olan dört bâb hucurâtın ziyâsını kat‘ etmekle zarar-ı şer‘îsini men‘ ü def‘ olunmak matlûbumuzdur deyü da‘vâ eylediklerinde mevlana-yı mezbûr ve mi‘mârân-ı mezbûrân keşf ü nazar eylediklerinde menzil-i mezkûr medrese-i merkūmun verâsında olup zarar-ı şer‘îsi olmadığını mi‘mârân-ı mezbûrân ve sâir mazbûtü’l-esâmî kimesneler ihbâr ve mütevellîyân-ı hâzırân-ı mezbûrân dahi tasdîk etmeleriyle ol-vechile müdde‘iyûn-ı mezbûrûn ziyâ da‘vâsıyla merkūm Bıçakcı Ali Beşe’ye bî-vech-i şer‘î mu‘ârazadan men‘ eylediğini mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 3 C sene 1223.