İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 429 Hüküm no: 412 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niyazi bt. Ahmed’in Koca Mustafa Paşa Vakfı’na ait Eminbey mahallesindeki dükkân ve mahzenlerin kullanım hakkının yarı hissesine sahip olduğu iddiasıyla vakfın mütevellisi aleyhine açtığı davada iddiasını ispat edemediği Mütevellî ile ba‘de’n-nizâ‘ mu‘ârazadan men‘ Ma‘rûz Derûn-ı arzuhâlde mezkûretül-ism zâtı mu‘arrefe Niyazi bt. Ahmed nâm hatun bi’t-terâzî meclis-i şer‘-i münîrde İstanbul’da vâki‘ Vezir-i a‘zam-ı esbak merhûm Koca Mustafa Paşa Vakfı’nın mütevellîsi sâhib-i arzuhâl el-Hâc Hüseyin Ağa b. Ömer tarafından husûs-ı âtîde vekîl-i müseccel-i şer‘îsi câbî-i vakf Mehmed Said Efendi b. Feyzullah mahzarında zikri âtî dekâkin ve mehâzînin nısflarına bâ-temessük mütevellî mutasarrıfe olup ol-vechile vaz‘-ı yedi mütehakkıka olan kezâlik zâtı mu‘arrefe Şerife Âmine bt. Ahmed nâm hatun hâzıra olduğu hâlde vakf-ı mezbûr müsakkafâtından İstanbul’da Eminbey mahallesinde kâin herbiri ma‘lûmü’l-hudûd beher şehr iki yüz elli akçe icâre-i müeccelelü bir bâb tütüncü ve bir bâb terzi ve iki bâb kahve dükkânlarıyla iki bâb mahzenlerin nısf hisse-i şâyi‘aları Saliha bt. Mehmed nâm hatunun bâ-temessük-i mütevellî bi’l-icâreteyn taht-ı tasarrufunda iken mezbûre Saliha Hatun bin iki yüz yirmi bir senesi Zilhiccesi gurresinde hâl-i hayat ve kemâl-i akl ü sıhhatinde bin beş yüz guruş bedel-i makbûz mukābelesinde dekâkin ve mehâzîn-i mezkûrenin nısflarını câbî-i vakf işbu vekîl-i mezbûr Mehmed Said Efendi huzûrunda bana fâriğa olup câbî-i mezbûr dahi târih-i merkūmda vakf-ı mezkûrun kāimmakām-ı mütevellîsi hâcegân-ı Dîvân-ı Hümâyûn’dan Derviş Mustafa Beyefendi’ye inhâ ol dahi tasarrufumu re’y ve müceddeden bir kıt‘a temessük tahrîr ve yedime i‘tâ edip ba‘dehû üç ay mürûrunda mezbûre Saliha Hatun fevt olmağla vakf-ı mezkûrun hâlâ mütevellîsi müvekkil-i mezbûr el-Hâc Hüseyin Ağa dekâkin ve mehâzîn-i mezkûrenin nısflarını iki yüz yirmi iki senesi Zilka‘de’sinin dokuzuncu günü müteveffât-ı mezbûrenin mahlûlünden hâzıra-i mezbûre Şerife Âmine Hatun’a bin iki yüz guruş icâre-i mu‘accele-i makbûza ve beher şehr yüz yirmi beş akçe icâre-i müeccele-i kadîmesiyle bi’t-tevliye îcâr ve teslîm etmekle hâlâ ben ferâğ-ı evvele binâen dekâkin ve mehâzîn-i mezkûrenin nısflarını taleb ederim deyü da‘vâ etdikde vekîl-i câbî-i mezbûr dahi cevâbında mezbûre Saliha Hatun târih-i mezkûrda maraz-ı mevti hâlinde müdde‘iye-i mezbûre Niyazi Hatun dekâkin ve mehâzîn-i mezkûrenin nısflarını kendüye fâriğa olmak için yerine bir hatun getirip fâriğa oldum deyü benim huzûrumda takrîr etdirip ben dahi kāimmakām-ı mütevellî-i mûmâ-ileyh inhâ ve tasarrufuna izin ve temessük tahrîr ve yedine i‘tâ olunup lâkin üç gün mürûr etmeksizin mezbûre Saliha Hatun bilâ-veled fevt olmağla müvekkilim mütevellî-i mezbûr el-Hâc Hüseyin Ağa dahi ferâğ-ı mezkûrun adem-i sıhhatine binâen dekâkin ve mehâzîn-i mezkûrenin nısflarını taraf-ı vakıfdan bi’t-tevliye hâzıra-i mezbûre Şerife Âmine Hatun’a vech-i meşrûh üzere îcâr ve teslîm etmiş idi deyip müdde‘iye-i mezbûrenin ber-vech-i muharrer müdde‘âsını bi’l-vekâle inkâr etmekle müdde‘iye-i mezbûre Niyazi Hatun müdde‘âsına şâhid olmak üzere ikāme eylediği dört nefer kimesneler edâ-i şehâdet-i şer‘iye edemeyip ve şâhid-i âdil-i âhar ikāmetinden izhâr-ı acz etmeğin mûcebince müdde‘iye-i mezbûre Niyazi Hatun da‘vâ-yı mezkûresiyle mütevellî-i müvekkil-i mezbûr el-Hâc Hüseyin Ağa’ya bilâ-beyyine mu‘ârazadan ba‘de’l-men‘ dekâkin ve mehâzîn-i mezkûrenin nısfları kemâ-kân hâzıra-i mezbûre Şerife Âmine Hatun’un tasarrufunda ibkā olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-gurreti R Sene 1223.