İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 430 Hüküm no: 413 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah’ın yanan keresteci dükkânlarını tekrar yapmaya söz verdiği halde yapmayan ortağı Kömürcü Osman Beşe aleyhine açtığı davada anlaşmaya vardıkları Keresteci dükkânı mu‘ârazadan men‘ Ma‘rûz Mahrûse-i Galata’da Sultan Bâyezid mahallesinde sâkin sâhib-i arzuhâl es-Seyyid Abdullah b. es-Seyyid İsmail nâm kimesne meclis-i şer‘-i münîrde derûn-ı arzuhâlde mezkûrü’l-ism Kömürcü es-Seyyid Osman Beşe b. Süleyman nâm kimesne muvâcehesinde mahalle-i mezbûrede vâki‘ iki tarafdan kömürcü mahzeni ve iki tarafdan tarîk-i âm ile mahdûd [ve] mukayyed ve mu‘teber bir bâb keresteci dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin dört sehm i‘tibârıyla bir sehmi benim ve iki sehmi mezbûr es-Seyyid Osman Beşe’nin ve bir sehmi gāib ani’l-meclis es-Seyyid Ebûbekir Beşe b. Ahmed’in yedimizde iştirâken ve şâyi‘an mülk ve hakkımız iken dükkân-ı mezkûr bundan akdem bi-kazâillâhi te‘âlâ vukū‘ bulan harîkde muhterik oldukdan sonra ben târih-i i‘lâm senesi Muharrem’inin yirmi yedinci günü mezbûr es-Seyyid Osman Beşe ile gedik-i mezkûra dâir terâfu‘-ı şer‘ ve yedinde olan hüccet-i şer‘iye mantûkunca dükkân-ı mezkûru mezbûr es-Seyyid Osman Beşe müceddeden malından binâ ve inşâ ve her ne masrûfu olur ise ancak müşterîki gāib-i mezbûrun rub‘ hissesine mürâca‘at edip benden kat‘a nesne mutâlebe etmemek üzere ta‘ahhüd etmiş iken el-hâletü hâzihî dükkân-ı mezkûru binâ ve inşâ etmemekle ber-mûceb-i ta‘ahhüd-i kadîmi üzere keresteci dükkânı binâsına şürû‘a mezbûr es-Seyyid Osman Beşe’ye tenbîh olunmak matlûbumdur deyü da‘vâ etdikde ol dahi cevâbında husûs-ı mezkûru ber-vech-i muharrer ikrâr ü i‘tirâf ve târih-i i‘lâmdan otuz bir gün tamamında ber-mûceb-i hüccet-i mezkûre dükkân-ı mezkûru kadîmi üzere binâ ve inşâya mübâşeret etmek üzere tekrar müte‘ahhid olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 2 min-Cumâdelûlâ sene 1223.