İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 431 Hüküm no: 414 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in muhâlaa yoluyla kocası Kileci Ahmed Beşe’den boşandığı Muhâla‘a Ma‘rûz Sâhibe-i arzuhâl mu‘arrefetü’z-zât Şerife Âişe bt. Mehmed nâm hatun meclis-i şer‘-i münîrde zevc-i muhâlı‘ı derûn-ı arzuhâlde mezkûrü’l-ism Kileci es-Seyyid Ahmed Beşe b. Hüseyin nâm kimesne muvâcehesinde mezbûr es-Seyyid Ahmed Beşe zevc-i dâhilim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh mehr-i müeccel hakkım olan iki yüz elli beş guruşun yüz otuz guruşu ile mezbûrun zimmetinde bir silecek ve bir peştemâl ve bir havlu kıymetlerinden dahi otuz guruş ki cem‘an yüz altmış guruşu bana işbu meclis-i şer‘de def‘ ü teslîm ben dahi yedinden tamamen ve kâmilen ahz ü kabz edip mâ‘adâsı olan yüz yirmi beş guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezkûru ba‘de’l-kabûl hukūk-ı zevciyete ve ibtidâ-i zevciyetden işbu târih-i i‘lâma gelince sâir beynimizde cereyân eden cemî‘ hukūk-ı şer‘iyeye müte‘allika mutlaka âmme-i de‘âvî ve kâffe-i mutâlebâtdan herbirimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve herbirimiz ber-vech-i meşrûh âharın ibrâsını kabûl eyledik deyü ikrâr ve tasdîkleri tescîl ve İstanbul Mahkemesi’nden huzûr. Fî 13 C sene 1223.