İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 432 Hüküm no: 416 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arnavut Mustafa Ağa’nın Kastamonu Sancağı mütesellimliğini kefaletiyle iltizam ettiği Sarraf Armiya aleyhine açtığı alacak davasının henüz sonuçlandırılmadığı Mazbata kaydı Ma‘rûz Sâhib-i arzuhâl mültezim tâifesinden Arnabud Mustafa Ağa b. Ahmed nâm kimesne meclis-i şer‘-i münîrde İstanbul’da Yeni Han’da mütemekkin sarrâf tâifesinden derûn-ı arzuhâlde mersûmü’l-ism Armiya v. İstefan nâm zimmî muvâcehesinde ben bundan akdem gāib ani’l-meclis Behlül nâm kimesne ile iştirâken medîne-i Kastamonu Sancağı Mütesellimliği’nin târih-i i‘lâm senesi Mart’ı ibtidâsından sene-i mezbûre Şubat’ı gāyetine gelince bir seneliğini Darbhâne-i âmire tarafından sarrâf-ı mersûm kefâletiyle iltizâm ve kabûl ve sâdır olan bir kıt‘a iltizâm emrini ahz ü kabz ve sarrâf-ı mersûma bi’l-emâne teslîm edip bu husûsa kırk iki bin guruş malımdan harc ü sarf eylediğimden sonra livâ-i mezbûr mütesellimliğini vüzerâ-yı i‘zâmdan sâbıkā rikâb-ı hümâyûn kāimmakāmı devletlü inâyetlü Tayyar Mahmud Paşa hazretleri matlûb buyurup masrûfum olan meblağ-ı merkūm kırk iki bin guruşun üzerine on bin guruş dahi fâide zammıyla cem‘an elli iki bin guruş bana i‘tâ etmek üzere mukāvele olunmuş iken sarrâf-ı mersûm şerîkim gāib-i mezbûr Behlül ile bi’l-ittifâk emr-i âlî-şân-ı mezkûru vezir-i müşârün-ileyh hazretlerine getirip benim kat‘a haber ve âgâhım yoğiken elli iki bin guruşu benim için sarrâf-ı mersûm ahz ü kabz etmekle meblağ-ı mecmû‘-ı mezkûru mersûm Armiya zimmîden taleb ederim deyü ba‘de’d-da‘vâ ve’l-istintâk sarrâf-ı mersûm dahi cevâbında eğerçi livâ-i mezbûr mütesellimliğini müdde‘î-i mezbûr Mustafa Ağa ile gāib-i merkūm Behlül iştirâken iltizâm ve kabûl edip lâkin vezir-i müşârün-ileyh hazretleri fermân-ı âlî-şânı benden aldığı esnâda beş bin guruş müdde‘î-i mezbûr Mustafa Ağa için ve beş bin guruş gāib-i merkūm Behlül için verip cem‘an on bin guruş ahz ü kabz etmemle mâ‘adâ kat‘a nesne kabz etmedim deyü kırk iki bin guruşu inkâr etmekle müdde‘î-i mezbûr ber-vech-i muharrer müdde‘âsını isbât için târih-i i‘lâm senesi Muharrem’inin yirmi sekizinci günü şâhide havâle olunup tarafeyn bir dahi meclis-i şer‘a gelmemeleriyle henüz da‘vâlarına faysal verilmediği vekāyi‘ kâtibimiz cerîdesinde mazbût olup imtisâlen li’l-emri’l-âlî sûret-i zabtı ihrâc ve İstanbul Mahkemesi’nden huzûr-ı âlîlerine i‘lâm olundu. Fî 19 min-Cumâdelâhir sene 1223.