İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 438 Hüküm no: 421 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Zekeriya Ağa’nın sattığı pirinç bedelinden Mehmed Ağa’dan sekiz bin iki yüz kuruş alacağı olduğu 8.200 guruş hüküm Ma‘rûz Sâhib-i arzuhâl es-Seyyid Zekeriya Ağa b. Osman nâm kimesne Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i münîrde derûn-ı arzuhâlde mezkûrü’l-ism Filibeli el-Hâc Osman Efendi dâmâdı Başa demekle ma‘rûf Mehmed Ağa b. el-Hâc İsmail nâm kimesne muvâcehesinde ben ve mezbûr Mehmed Ağa bundan akdem medîne-i Filibe’de sâkin olduğumuz hâlde malımdan beher keyli beşer guruş beşer paraya olmak üzere bin altı yüz keyl pirinci mezbûr Mehmed Ağa’ya bey‘ ü temlik ve teslîm ve semeni olan cem‘an sekiz bin iki yüz guruşu Enderûn-ı Hümâyûn agavâtından gāib ani’l-meclis es-Seyyid Mustafa Ağa’ya götürüver deyü emr eylediğimde ol dahi ber-vech-i muharrer iştirâ ve temellük ve tesellüm ve kabûl ve âhara bey‘le istihlâk edip lâkin semen-i mezkûr sekiz bin iki yüz guruşu emrimle gāib-i mezbûra vermeyip zimmetinde kalmağla hâlâ taleb ederim deyü da‘vâ etdikde ol dahi cevâbında müdde‘î-i mezbûr es-Seyyid Zekeriya Ağa medîne-i mezbûrede ol-mikdâr keyl pirinci Âsitâne-i aliyye’de sâkin kayınpederin mezbûr el-Hâc Osman Efendi’ye götür teslîm eyle ol dahi vech-i meşrûh üzere sekiz bin iki yüz guruşa âhara bey‘ birle semeni gāib-i mezbûr es-Seyyid Mustafa Ağa’ya versin deyü yedime bi’l-emâne teslîm edip ben dahi ba‘de’l-ahz ve’l-kabz kayınpederim mezbûra teslîm ol dahi ahz ü kabz ve âhara bey‘ birle semenini gāib-i mezbûr es-Seyyid Mustafa Ağa’ya vermeyip deyni olan sarrâfa vermiş idi deyü müdde‘î-i mezbûrdan ol-mikdâr pirinci bi’l-emâne kabzını ikrâr lâkin kat‘iyyen iştirâ eylediğini ve mâ‘adâ müdde‘âsını inkâr etmekle müdde‘î-i mezbûr ber-minvâl-i muharrer müdde‘âsını udûlden Ali Ağa b. Ebîbekir ve Salih Ağa b. Abdullah nâm kimesneler şehâdetleriyle bi’l-muvâcehe vech-i şer‘î üzere isbât etdikden sonra mezbûr Mehmed Ağa husûs-ı mezkûru dahi bi-tamamihi tâyi‘an ve kat‘iyyen ikrâr ü i‘tirâf etmeğin alâ mûcibi i‘tirâfihî meblağ-ı merkūm sekiz bin iki yüz guruşun müdde‘î-i mezbûr es-Seyyid Zekeriya Ağa’ya edâ ve teslîmiyle merkūm Mehmed Ağa ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî 7 min-Cemâziyelâhir sene 1223.