İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 439 Hüküm no: 422 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Trabzonlu Mehmed Çavuş’un kiracısı olduğu Galata’daki kahve dükkânı gediğiyle alakalı vârislerinin dükkânın mutasarrıfı Kahvecibaşı Osman Ağa aleyhine açtıkları davada haksız olduklarının anlaşıldığı Galata’da kahve gediği Ma‘rûz Bundan akdem vefât eden kalyon çavuşlarından Şişko Çavuş demekle ma‘rûf Trabzonî es-Seyyid Mehmed Çavuş b. Uzun Osman nâm kimesnenin vâlidesi sâhibe-i arzuhâl zâtı mu‘arrefe Şerife Âmine Hatun bt. es-Seyyid Hasan meclis-i şer‘-i münîrde zikri âtî dükkânın bâ-temessük-i mütevellî bi’l-icâreteyn mutasarrıfı ve hâlâ Dârü’s-sa‘âdeti’ş-şerîfe ağası kahvecibaşısı derûn-ı arzuhâlde mezkûrü’l-ism Osman Ağa b. Abdurrahman nâm kimesne tarafından husûs-ı âtîde vekîl olduğu Bostanî Ali Ağa b. Ali ve Bostanî Hasan Ağa b. Hüseyin nâm kimesneler şehâdetleriyle sâbit olan Teberdâr Ahmed Ağa b. Mehmed nâm kimesne muvâcehesinde mahrûse-i Galat’da bezzâzistân kurbünde Bıçakçılar kurbünde vâki‘ ma‘lûmü’l-hudûd bir bâb kahve dükkânı müvekkil-i mezbûr Osman Ağa’nın bi’l-icâreteyn taht-ı tasarrufunda ve derûnunda mevcûde gedik ta‘bîr olunur eşyâ-i ma‘lûme bâ-hüccet benim yedimde malım olmağla müvekkil-i mezbûr Osman Ağa eşyâ-i mezkûreyi bana teslîm birle dükkân-ı mezkûru âhara îcâr etmekle icâre-i mezkûreyi fesh birle bana îcâr etmek üzere vekîl-i mezbûra tenbîh olunmak matlûbumdur deyü da‘vâ etdikde vekîl-i mezbûr dahi cevâbında müteveffâ-yı mezbûr es-Seyyid Mehmed Çavuş’un veresesi zevcesi Şerife Ümmügülsüm Hatun bt. Ahmed kendi nefsinden asâleten ve sagīre kızı Şerife Hadice’nın vasîsi olmağla vesâyeten ve müdde‘iye-i mezbûre Şerife Âmine Hatun kezâlik asâleten işbu târih-i i‘lâm senesi Safer’inin yedinci günü Rumeli kādıaskeri sâbık fazîletlü semâhatlü atûfetlü Ahmed Şemseddin Efendi huzûrunda evvelâ zevce-i mezbûre Şerife Ümmügülsüm Hatun dükkân-ı mezkûr derûnunda mevcûde eşyâ-i ma‘lûme zevcim müteveffâ-yı mezbûrun hayatında gedik olmak üzere yedinde emvâli olup dükkân-ı mezkûr dahi aded-i şühûr beyân olunmaksızın taht-ı icâresinde iken zevcim merkūm fevt ve eşyâ-i mezkûre benimle kızım sagīre mezbûreye ve vâlidesi merkūme Şerife Âmine Hatun’a mevrûs olmuş idi. El-hâletü hâzihî eğerçi icâre-i mezkûre zevcim mezbûrun fevtiyle münfesih olup lâkin mücerred dükkân-ı mezkûrun havâyî gediği zevcim mezbûrun olmak üzere hayatında mâlı olduğu ecilden kemâ-fi’s-sâbık eşyâ-i mezkûreye gedik i‘tibârıyla dükkân-ı mezkûru bize kadîmî kirâ ile îcâr ve teslîm olunup tasarrufumuza mümâna‘at etmemek üzere merkūm Osman Ağa’ya tenbîh olunmak bi’l-asâle ve bi’l-vesâye murâdımdır deyü da‘vâ ve sâniyen müdde‘iye-i merkūme Şerife Âmine Hatun dahi dükkân-ı mezkûr oğlu müteveffâ-yı mezbûrun hayatında taht-ı icâresinde olduğunu tasdîk edip lâkin işbu yedimde olup bin iki yüz on senesi Cumâdelâhire’nin on sekizinci günü târihiyle müverrah Galata Kısmet-i Askeriye Mahkemesi sicillinden muhrec ve mazmûnu müsbet bir kıt‘a mübâya‘a hücceti mantûkunca eşyâ-i mezkûreyi ben ol târihde hâlik olan Yanaki Reis v. Dimitri zimmînin veresesinden bin üç yüz elli guruş semen-i medfû‘ ve makbûza iştirâ edip ol-vechile eşyâ-i mezkûre benim mülk-i müşterâm olup oğlum merkūmun kat‘iyyen alâkası olmamağla öyle olıcak dükkân-ı mezbûrun havâyî gediği benim olmağla merkūm Osman Ağa dükkân-ı mezkûru müstakıllen bana îcâr edip ben tasarruf etmek üzere mezbûr Osman Ağa’ya tenbîh olunsun deyü da‘vâ lâkin takrîr-i meşrûhları üzere gedik-i mezkûr aklâmdan birinde mukayyed ve mu‘teber olmamağla tasaddî eyledikleri havâyî gedik da‘vâları meşrû‘a olmamağla iltifât olunmayıp ancak dükkân-ı mezkûr derûnunda mevcûde eşyâda müvekkil-i merkūm Osman Ağa’nın alâkası olmadığına binâen müvekkil-i mezbûr eşyâ-i mezkûreyi verese-i mezbûrâta teslîm ve beş yüz guruş dahi malından teberru‘an sagīre-i mezbûreye vermiş idi deyü takrîrine mutâbık ve kādıasker-i müşârün-ileyhin hatmiyle mahtûm ibrâz eylediği bir kıt‘a i‘lâm-ı şer‘înin mazmûnunun müdde‘iye-i mezbûre Şerife Âmine Hatun ikrâr u i‘tirâf etmeğin mûcebince müdde‘iye-i mezbûre da‘vâ-yı mezkûresiyle müvekkil-i merkūm Osman Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 21 min-Cemâziyelâhir sene 1223.