İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 440 Hüküm no: 423 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın mutasarrıfı olduğu çilingir dükkânından kirayı arttırmak niyetiyle kiracısı Serope v. Kigork’u çıkaramayacağı Süleymaniye’de çilingir gediği Ma‘rûz Ahmed Ağa b. Ali nâm kimesne meclis-i şer‘-i münîrde İstanbul’da Süleymaniye kurbünde kâin bir bâb çilingir dükkânında beher şehr yüzer para kirâ ile müstecir olan çilingir esnâfından Serope v. Kigork nâm zimmî muvâcehesinde esnâf-ı mezbûre kethudâsı es-Seyyid Yakub Ağa ve yiğitbaşısı Matus ve ihtiyârlarından Artin ve Bedros ve Mardıros ve sâir ustalar hâzır oldukları hâlde dükkân-ı mezkûr bâ-temessük-i mütevellî bi’l-icâreteyn benim taht-ı tasarrufumda ve derûnunda mersûm Serope zimmî şehr[î] yüzer para kirâ ile müşâhereten müstecirim olmağla târih-i i‘lâm şehri gāyetinde fesh-i akd-i icâre etmemle dükkân-ı mezkûru gāyet-i şehrde tahliye ve bana teslîme mersûm Serope zimmîye tenbîh olunmak matlûbumdur deyü ba‘de’d-da‘vâ ve’l-istintâk mersûm Serope zimmî cevâbında benim müstecir olduğum dükkân-ı mezkûr derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme müstakıllen benim yedimde mülküm olup ve Âsitâne-i aliyye’de vâki‘ bi’l-cümle kapı âlâtcı ve çilingirci dükkânlarının gedikleri Başmuhâsebe’de [60b] mukayyed ve mu‘teber olmağla hatta işbu hâzırûn esnâf-ı mezbûrûnun yedlerinde olan bâlâsı tuğrâ-yı garrâ-yı cihân-dârî ile müveşşah fermân-ı âlî-şânda mastûr ve musarrah olup ancak mülk sâhibleri gedik mâliki müstecirlerini kirâ artırmak dâ‘iyesiyle ihrâclarına tasaddî etmemek şurût-ı nizâm-ı mu‘teberemizdendir deyü mazmûnu min-külli’l-vücûh takrîrlerine mutâbık esnâf-ı hâzırûn-ı merkūmûnun ibrâz eyledikleri emr-i âlî-şân-ı mezkûrun mazmûnunu müdde‘î-i mezbûr Ahmed Ağa bi-tamamihi tâyi‘an ve kat‘iyyen ikrâr ü i‘tirâf etmeğin ber-mûceb-i emr-i âlî müstecir-i mersûm Serope zimmînin kirâ artırmak dâ‘iyesiyle dükkân-ı mezkûrdan bî-vech ihrâcına ta‘arruz etmemek iktizâ eylediği İstanbul Mahkemesi’nden huzûr. Fî 21 C sene 1223.