İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 447 Hüküm no: 430 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Andriyas’ın Fenerkapısı’ndaki yarım menzil hissesini yedi yüz kuruşa babasına ve babasının da Ketenciler’deki çilingir dükkânı gediği hissesini dört yüz kuruşa oğlu Kirkor’a sattığı Fenerkapısı’nda menzil mâddesi Ma‘rûz Arzuhâl eden Kirkor nâm zimmî meclis-i şer‘-i hatîrde babası derûn-ı arzuhâlde mersûmü’l-ism Andriyas v. Ohannes nâm zimmî muvâcehesinde İstanbul’da Kadırga Limanı kurbünde Kâtib Sinan Efendi Mescid-i şerîfi Vakfı’nın mütevellîsi el-Hâc Ömer Efendi tarafından mürsel vekîli câbî-i vakf es-Seyyid Hüseyin Efendi hâzır olduğu hâlde hâmiş-i arzuhâlde mastûr defter-i vakıfdan muhrec derkenâr nâtık olduğu üzere vakf-ı mezbûr müsakkafâtından İstanbul’da hısnı ebvâbından Fenerkapısı dâhilinde Tevkī‘î Cafer mahallesinde vâki‘ beher şehr altmışar akçe icâre-i müeccelelü ma‘lûmü’l-hudûd ve’l-müştemilât bir bâb menzilin nısf-ı şâyi‘i babam mersûm Andriyas zimmînin ve nısf-ı şâyi‘-i âharı zevcesi anam Talita bt. Kirkor Nasrâniyenin bi’l-icâreteyn iştirâken ve şâyi‘an taht-ı tasarruflarında iken anam mesfûre Talita bin yüz doksan altı senesi Cumâdelâhire’nin on birinci günü hâlike olup menzil-i mezkûrun nısf-ı şâyi‘i bana âdiyen intikāl etdikden sonra ben târih-i mezbûrda sagīr bulunmamla hâletem Maryem bt. Ohannes Nasrâniye vasîm olmak takrîbiyle nısf-ı menzil-i mezkûru bilâ-bedel babam mesfûr Andriyas zimmîye bi’l-vesâye bâ-re’y-i mütevellî fâriğa olmağla hâlâ ben ferâğ-ı mezkûrun adem-i sıhhatine binâen ve nısf-ı menzil-i mezkûru babam mesfûr Andriyas zimmîden taleb ederim deyü mütevellî vekîli hâzır-ı mezbûrun tasdîkleriyle da‘vâya tasaddî etmiş idim el-hâletü hâzihî ben ber-vech-i muharrer iddi‘â eylediğim nısf-ı menzil-i mezkûru yedi yüz guruş bedel mukābelesinde babam mesfûr Andriyas zimmîye bâ-re’y-i mütevellî müceddeden ifrâz ve tefvîz eylediğimde ol dahi tefevvüz ve kabûl ve bedel-i mezkûr yedi yüz guruşu bana def‘ ü teslîm ben dahi ahz ü kabz ve istihlâk etmemle bi’l-cümle husûs-ı mezkûra ve menzil-i merkūmda şurût-ı müfside müdde‘âsına ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden babam mesfûrun zimmetini ol dahi bedel-i müstehlek-i merkūmun istirdâdına ve sâire müte‘allika âmme-i de‘âvîden benim zimmetimi herbirimiz ibrâ-i âmm-i sahîh-i şer‘î ile kabûlü hâvî ibrâ ve iskāt eyledik dediğini mersûm Andriyas zimmî tasdîk ve mütevellî vekîli hâzır-ı mezbûr dahi tasarrufunu re’y etdikden sonra mersûm Andriyas zimmî meclis-i şer‘de oğlu mesfûr Kirkor zimmî muvâcehesinde İstanbul’da Ketenciler kurbünde vâki‘ kazgancı dükkânına muttasıl bir bâb çilingir dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin dört sehm i‘tibârıyla bir sehmi akd-i âti’z-zikrin sudûruna değin benim ve bir sehmi oğlum mesfûr Kirkor zimmînin ve iki sehmi âharın yedimizde iştirâken ve şâyi‘an mülk ve hakkımız olmağla hâlâ ben gedik ta‘bîr olunan âlât-ı lâzıme-i mezkûrede ber-i‘tibâr-ı merkūm mâlik olduğum bir sehm hisse-i şâyi‘a-i mezkûremi tarafeynden bi’l-îcâb ve’l-kabûl bâtten ve sahîhan bi-safkatin vâhidetin oğlum mersûm Kirkor zimmîye dört yüz guruş semen-i medfû‘ ve makbûza bey‘ ü temlik ve teslîm eylediğimde ol dahi iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika âmme-i de‘âvîden herbirimiz âharın zimmetini kabûlü hâvî ibrâ ve iskāt eyledik ba‘de’l-yevm gedik ta‘bîr olunan âlât-ı lâzıme-i mezkûrenin nısf-ı şâyi‘i oğlum mersûm Kirkor zimmînin mülk-i mahzı ve hakk-ı sırfı olup benim kat‘a alâka ve medhalim kalmamışdır deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî 25 min-Cemâziyelâhir sene 1223.