İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 448 Hüküm no: 431 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın İbraillioğlu Ali Ağa’ya olan bin dokuz yüz kuruş borcunu taksitle ödemeye söz verdiği 1.900 guruş taksît Ma‘rûz Hâmiş-i arzuhâlde mastûr derkenâr nâtık olduğu üzere İbraillioğlu el-Hâc Ali Ağa b. el-Hâc Ahmed nâm kimesneye bâ-i‘lâm-i şer‘î mahkûmün-bih bin dokuz yüz guruş deyni için nakībü’l-eşrâf fazîletlü semâhatlü atûfetlü efendi hazretlerinin başçavuşu mahbesinde mahbûs olup arzuhâl eden es-Seyyid el-Hâc Ali Ağa b. el-Hâc Ali meclis-i şer‘-i münîrde dâyini mezbûr el-Hâc Ali Ağa muvâcehesinde ben bundan akdem mezbûr el-Hâc Ali Ağa ile fâide-i hâsıla beynimizde beraber olmak üzere bir müddet şerîk olup ba‘dehû fesh-i akd-i şirket birle Mısır ve Anapa ve Dağıstan ticâretlerinin hesâbını rü’yet etmek iktizâ eder iken ancak Mısır ticâretinin hesâbını mezbûr el-Hâc Ali Ağa ile rü’yet ve re’s-i mâl ve fâide-i hâsıladan benim bin dokuz yüz guruş zimmetimde mezbûra deynim zuhûr etmekle üzerime hükm ve i‘lâm olunmuş idi. El-hâletü hâzihî mârrü’z-zikr Anapa ve Dağıstan hesâblarını dahi tüccâr ma‘rifetleriyle rü’yet etmek üzere mezbûr el-Hâc Ali Ağa’ya tenbîh olunmak matlûbumdur deyü da‘vâya tasaddî eylediğimde ol dahi cevâbında ben seninle zikr olunan Mısır ve Anapa ve Dağıstan ticâretlerinin hesâblarını mahzar-ı şühûdda tüccâr ma‘rifetiyle yegân yegân sahîhan rü’yet eylediğimizde re’s-i mâl ve fâide-i hâsıladan senin zimmetinde meblağ-ı merkūm bin dokuz yüz guruş alacak hakkım zuhûr etmekle bi’l-cümle husûs-ı şirkete ve hesâbda sehv ve galat vukū‘una ve meblağ-ı merkūmdan mâ‘adâ sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mütâlebâtdan herbirimiz âharın zimmetini kabûlü hâvî ibrâ ve iskāt etmişdik deyü sûret-i def‘de eylediği da‘vâsını udûlden ve tüccârdan el-Hâc İbrahim Ağa b. el-Hâc Ali ve Kutluşah b. el-Hâc Halil nâm kimesneler şehâdetleriyle muvâcehemde vech-i şer‘î üzere isbât etmeğin mûcebince tasaddî eylediğim da‘vâ-yı mezkûremle bî-vech mu‘ârazadan men‘ olunup meblağ-ı merkūm bin dokuz yüz guruş kemâ-kân hükmolunmuş idi lâkin meblağ-ı mahkûmün-bih merkūm hâlâ ve def‘aten bir vechile edâya iktidârım olmayıp ber-vech-i âtî tecîl ve taksîte tâlib olduğumda dâyinim mezbûr el-Hâc Ali Ağa dahi meblağ-ı merkūmun dört yüz guruşunu târih-i i‘lâmdan beş gün mürûrunda ve mâ‘adâ bin beş yüz guruşunu beher altı ay tamamında beşer yüz guruşdan cem‘an bir buçuk sene tamamına değin tamamen kendiye edâ etmek üzere rızâsıyla beni tecîl ve taksît eylediğinde ben dahi ecel-i merkūmu kabûl ve meblağ-ı merkūm bin dokuz yüz guruşu ber-vech-i muharrer müeccelen ve mukāssatan edâya ta‘ahhüd eyledim deyü ikrâr ve tasdîkleri İstanbul Mahkemesi’nden huzûr. Fî 22 C sene 1223.