İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 449 Hüküm no: 432 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul suriçi, Galata, Üsküdar ve Eyüp’teki Yahudi bakkallarının talebi üzerine nizamlarına dair olup kazaen kaybolan fermanlarının yenilenmesinde bir sakınca olmadığı Yahûd bakkāllarına dâir Ma‘rûz Sâdır olan fermân-ı âlîlerine imtisâlen Âsitâne-i aliyye ve Bilâd-ı selâse’de vâki‘ ashâb-ı arzuhâl yüz altmış altı aded Yahûd bakkāllarının umûr ve husûsları esnâf-ı sâire misillü bâzârbaşı ve bölükbaşı ve ihtiyârları ma‘rifetleriyle rü’yet olunup ecânibden kimesne taraflarından dahl ü ta‘arruz olunmamak üzere bin yüz altmış altı senesi Safer’inde verilen sûret ve emr-i âlî kazâen zâyi‘ olmuş olduğundan kaydı mûcebince zâyi‘den müceddeden sûret ve emr-i âlî ısdâr buyurulmasını mesfûrûn istid‘â etmeleriyle vech-i muharrer üzere târih-i mezbûrda ber-vech-i tafsîl verilen sûret ve emr-i âlî-şân ve memnû‘iyet-i inhisâr-ı bey‘ ü şirâyı mutazammın şeref-yâfte-i sudûr olan hatt-ı hümâyûn-ı şevket-makrûn kaydlarına ve işbu telhîse ve sicillâta nazar ve mütâla‘a olundukda erzâk makūlesinde bu nizâm mâni‘ değil vâkı‘a her isteyen alsa vaktiyle zahîre bulunmaz lâkin sebzevâtın mârdebâzları [madrabazları] ve eşyâ-i sâirenin ez-cümle Ankara şalîsi ve bunun emsâli şeylerin birer esnâfa mahsûrunu ve âharın bey‘ ü şirâ edememesi için olsun havâyic-i zarûriyeden olup vaktiyle bulunmaması ibâdullâha muzır olur şeylerden don yağı gibi ve onun emsâlinin nizâmları dursun deyü mukayyed olup ancak bakkāl tâifesinin gedikleri mâl-ı tüccâra mukābil olup ve onların bey‘ ü şirâları erzâk makūlesinden olmağla hâmiş-i arzuhâlde mastûr emr-i âlî-şânın tecdîd ve istihkâmında mahzûr melhûz olmadığı İstanbul Mahkemesi’nden huzûr-ı âlîlerine i‘lâm olundu. Fî 26 C sene 1223.