İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 451 Hüküm no: 434 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayaklı Yorgi’nin Silivrikapısı haricindeki altı dönüm enginarlık gediğine müdahale ettiği iddiasıyla Gabril v. Cihan aleyhine açtığı men davasında iki yüz kuruşa sulh olduğu Mevlevîhâne Yenikapısı’nda ve Silivrikapısı’nda enginarlık Ma‘rûz Bağçevân tâifesinden sâhib-i arzuhâl Ayaklı Yorgi v. İstavri nâm zimmî meclis-i şer‘-i münîrde derûn-ı arzuhâlde mersûmü’l-ism Çiftçi Gabril v. Cihan nâm zimmî muvâcehesinde Ketenci Mehmed Ağa b. Hüseyin nâm kimesne hâzır olduğu hâlde İstanbul hısnı ebvâbından Mevlevîhâne Yenikapısı hâricinde kâin Şeyh Hulusi Derviş Bağçesi demekle meşhûr bir bâb bağçe ve Silivrikapısı hâricinde Süleyman Ağa sahrâsında vâki‘ altı dönüm mikdârı enginarlık derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmeler benim yedimde müstakıllen mülküm iken ben bin iki yüz on bir senesinde ancak bağçe-i mezkûrenin gediğini bin üç yüz elli guruş semen-i medfû‘ ve makbûza hâzır-ı mezbûr Mehmed Ağa’ya bey‘ ü temlik ve teslîm edip lâkin mârrü’z-zikr enginarlık gediğini kat‘a bey‘ etmemişken hâzır-ı mezbûr Mehmed Ağa enginarlık-ı mezkûrun gediğini üç yüz guruş semen-i makbûza mersûm Gabril zimmîye bey‘ ü teslîm ol dahi iştirâ ve teslîm ve kabûl ve ol-vechile vaz‘-ı yed etmekle keff-i yed birle bana teslîme mersûm Gabril zimmîye tenbîh olunmak matlûbumdur deyü da‘vâya tasaddî eylediğimde ol dahi cevâbında sen târih-i mezbûrda bağçe-i mezkûre ile enginarlık-ı merkūmun gediğini meblağ-ı merkūm bin üç yüz elli guruşa hâzır-ı mezbûra bey‘ ve temlik ve teslîm etmişdin deyü beni def‘a tasaddî ve ol-vechile beynimizde ba‘de vukū‘i’l-münâza‘a bâ-vesâtet-i muslihîn beynimiz tevfîk ve ıslâh olunup ben ber-vech-i muharrer tasaddî eylediğim da‘vâ-yı mezkûremden mersûm Gabril zimmî ile bi’t-tav‘ ve’r-rızâ iki yüz guruş bedel-i medfû‘ ve makbûza ba‘de akdi’l-musâlaha ve’l-kabûl bi’l-cümle gedik-i mezkûr husûsuna ve sâire müte‘allika âmme-i de‘âvîden mersûm Gabril zimmî ile hâzır-ı mezbûr Mehmed Ağa’nın zimmetlerini ibrâ-i âmm-ı sahîh-i şer‘î ile kabûllerini hâvî ibrâ ve iskāt eyledim deyü ikrâr ve tasdîkleri İstanbul Mahkemesi’nden huzûr. Fî 27 C sene 1223.