İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 452 Hüküm no: 435 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe bt. Abdullah’ın oturduğu vakıf menzili tahliye edip Abacızade Ali Mescidi Vakfı mütellisi Şeyh Ahmed Efendi’ye teslim etmesine karar verildiği Oda binâsı mâddesi Ma‘rûz İstanbul’da Davudpaşa İskelesi kurbünde Kasab İlyas mahallesinde vâki‘ Abacızâde Ali Bey Mescid-i şerîfi Vakfı’nın mütevellîsi ve imâmı sâhib-i arzuhâl Şeyh Ahmed Efendi b. Mehmed meclis-i şer‘-i münîrde derûn-ı arzuhâlde ismi mezkûre zâtı mu‘arrefe olan Mihri nâm-ı diğer Habibe bt. Abdullah nâm hatun muvâcehesinde ashâb-ı arzuhâl mahalle-i mezbûre ahâlileri mazbûtü’l-esâmî kimesneler hâzır oldukları hâlde mütevellîsi olduğum mescid-i şerîf-i mezkûr havlusunda bundan akdem imâm olanlar sâkin olmak için Şeyhülislâm-ı esbak merhûm Aşir Efendi bir bâb oda binâ ve mescid-i mezkûra kapı küşâd edip bir müddet imâm olanlar sâkin oldukdan sonra benden mukaddem mütevellî bulunan Mustafa Reşid nâm kimesne oda-i mezkûru tağyîr ve menzil heyetine koyup mu‘accele-i ma‘lûme ve beher şehr on beşer akçe icâre-i müeccele ile mezbûre Habibe Hatun’a îcâr etmekle menzil-i mezkûrdan hurûc birle imâm olanlar sâkin olmak için bana teslîme mezbûreye tenbîh olunmak murâdımdır deyü bi’t-tevliye da‘vâ eyledikde işbu arzuhâle nazar ve keyfiyeti tahkīk ve huzûrumuza i‘lâm eyleyesiz deyü sâdır olan fermân-ı âlîlerine imtisâlen kıbel-i şer‘den mürsel Kâtib Merhabâzâde Mahmud Efendi dâ‘îleri mescid-i şerîf-i mezkûra varıp huzûr-ı Müslimînde ba‘de akdi’l-meclis Kasab İlyas mahallesi imâmı Hafız Mustafa Efendi ve civârında kâin Kürkçübaşı mahallesi imâmı Abdullah Efendi ve civârında vâki‘ Hobyar mahallesi imâmı Hüseyin Efendi ahâlilerinden Hafız Süleyman Efendi ve Hafız Salih Efendi ve Salih Ağa ve es-Seyyid el-Hâc Ali Ağa ve el-Hâc İbrahim Ağa ve Mehmed Ağa ve İsmail Ağa ve Hüseyin Ağa ve Hasan Ağa ve Ebûbekir Ağa ve Süleyman Ağa ve diğer Mehmed Ağa ve âhar Mehmed ve Ahmed Ağa ve Şeyh Mustafa Efendi ve Ömer Ağa ve Mehmed ve sâirlerinden husûs-ı mezkûr istintâk eyledikde merhûm-ı müşârün-ileyh sâlifü’z-zikr menzil mahâllini ancak imâm olanlar sâkin olmak için bir bâb oda binâ eylediğini herbiri bi’l-muvâcehe alâ tarîki’ş-şehâde haber verdiklerini kâtib-i mezbûr dâ‘îleri mahâllinde ketb ü tahrîr ve ma‘an meb‘ûs ümenâ-i şer‘le Çarşamba günü arz odasında huzûr-ı fâizü’n-nûr-ı âsafânelerinde ma‘kūd meclis-i şer‘-i şerîfde tarafeyn muvâcehelerinde alâ vukū‘ihî inhâ ve takrîr etdikde menzil-i mezbûru tahliye ve kadîmî üzere mütevellî imâm-ı mezbûr Şeyh Ahmed Efendi’ye teslîme mezbûre Habibe Hatun’a şer‘an tenbîh olunup lâkin mezbûre Habibe Hatun ben menzil-i mezkûra malımdan mebâliğ-i vefîre harc ü sarf etmiş idim deyü da‘vâya tasaddî ve ber-vech-i muharrer da‘vâ-yı mezkûresi mahâllinde mi‘mâr ağa ma‘rifetiyle keşf ü takvîm olunmağa muhtâc olduğu İstanbul Mahkemesi’nden huzûr. Fî 26 C sene 1223. Temme’l-kelâm Nemakahu’l-fakīru ileyh te‘âlâ Dürrîzâde Mehmed Hidayetullah el-kādî bi-Dâri’l-Hilâfeti’l-Aliyye Gufire lehümâ [mühür]