İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 453 Hüküm no: 436 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Minasfan v. Agop’un ölmesi üzerine İznikmid’deki mumhanesinin oğlu Karabet’e intikal ettiği anlaşıldığından buna dair ferman verilmesi gerektiği Şem‘hâne mâddesi sâbık efendi hazretlerinin zamanında ve mühürleriyle mahtûm i‘lâm Ma‘rûz Medîne-i İznikmid nâibi Mustafa Edib Efendi dâ‘îlerinin mührü mutâbık işbu bir kıt‘a i‘lâmı bâlâsına bu dâ‘îlerine hitâben sâdır olan fermân-ı âlîlerine imtisâlen i‘lâm-ı mezkûr ve hâmişinde olan fermân-ı âlî-şân ve muktezâya nazaran ve mütâla‘a olundukda Kocaeli Sancağı’nda İznikmid nâhiyesine tâbi‘ mahsûl-i mukāta‘a-i şem‘hâne-i asel ve resm-i fıçı-i gebrân ve mukāta‘a-i bozahâne der-nefs-i şehr on dört bin akçe yazı ile defter-i mefâsilde muharrir kalemiyle tahrîr ve defter-i icmâlde mîr-livâ hâssı mülhakātından olduğu defter-i hâkānîde mukayyed olmağın husûs-ı mezkûrun hakīkati mahâllinden lede’l-isti‘lâm nefs-i İznikmid’de vâki‘ mîr-livâya hâsıl kayd olunan kadîmî şem‘hâne-i asele İznikmid mütemekkinlerinden Zakar zimmî mutasarrıf iken hâlik olup oğulları Melkon ve Agop zimmîlere ba‘de’l-intikāl onlar dahi ber-vech-i münâsafe mutasarrıflar iken mesfûrân Melkon ve Agop zimmîler iki yüz on yedi senesinde herbiri müte‘âkiben hâlikler olduklarında şem‘hâne-i mezkûrenin nısfı mersûm Melkon zimmînin oğlu Bağdisar zimmîye ve nısf-ı âharı mesfûr Agop zimmînin oğlu Minasfan zimmîye ba‘de’l-intikāl mesfûr Bağdisar zimmî nısf hissesini mesfûr Minasfan zimmîye ferâğ u kasr-ı yed ve yedinde bir kıt‘a hüccet i‘tâ edip ol-vechile mecmû‘una mutasarrıf iken mesfûr Minasfan zimmî hâlik oldukda şem‘hâne-i mezkûre sulbî kebîr oğlu Karabet zimmîye intikāl edip ve şem‘-i asel i‘mâli medîne-i İznikmid’de kârhâne-i mezkûreye mahsûs olup el-yevm cârî olduğunu mahâllinde bî-garaz erbâb-ı vukūf haberleri ve atik emr-i âlî-şânın kaydı sicill-i mahfûzda mastûr ve mukayyed olduğu i‘lâm-ı mezkûrdan müstebân olmağla mersûm Karabet zimmî şem‘-i asel i‘mâli medîne-i mezbûrede kârhâne-i mezkûreye mahsûs olduğunu ve mesfûr Karabet’in ismi tasrîhini hâvî tecdîden bâlâsı tuğrâ-yı garrâ-yı cihân-dârî ile muvaşşah bir kıt‘a fermân-ı âlî-şân sudûru iktizâ eylediği İstanbul Mahkemesi’nden huzûr. Fî 27 C sene 1223.