İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 454 Hüküm no: 437 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma bt. Mahmud’un babasından kendisine intikal eden menzile müdahale ettiği iddiasıyla üvey annesi Ayşe aleyhine açtığı davada haksız olduğunun anlaşıldığı Menzil nizâ‘ı sâbık efendi hazretlerinin zamanında ve mühürleriyle mahtûm i‘lâm Ma‘rûz Zâtı ta‘rîf-i şer‘î ile mu‘arrefe olan Esma bt. Mahmud nâm hatun meclis-i şer‘-i münîrde üvey vâlidesi kezâlik zâtı mu‘arrefe olan Âişe bt. Mehmed nâm hatun mahzarında Ders-i âm Şeyh Mustafa Efendi Vakfı’nın kāimmakām-ı mütevellîsi Hafız Halil Efendi b. Halil hâzır olduğu hâlde vakf-ı mezbûr müsakkafâtından İstanbul’da Sultanselim kurbünde Debbâğ Yunus mahallesinde vâki‘ ma‘lûmü’l-hudûd ve’l-müştemilât bir bâb menzil babam müteveffâ-yı mezbûr Mahmud’un hayatında bi’l-icâreteyn taht-ı tasarrufunda olup ba‘de vefâtihî hasbe’l-âde bana intikāl etmiş iken üvey vâlidem mezbûre Âişe Hatun menzil-i mezkûru fuzûlî zabt ve vaz‘-ı yed etmekle menzil-i mezkûrdan keff-i yed ve bâ-re’y-i mütevellî bana teslîme mezbûre Âişe Hatun’a tenbîh olunmak matlûbumdur deyü da‘vâ etdikde mezbûre Âişe Hatun dahi cevâbında babası müteveffâ-yı mezbûr Mahmud hâl-i hayat ve kemâl-i akl ü sıhhatinde menzil-i mezkûrun nısf-ı şâyi‘i sene-i sâbıkā Zilhiccetü’ş-şerîfesi gurresinde ve nısf-ı şâyi‘-i âharını târih-i i‘lâm senesi Muharremi’l-harâm’ı gurresinde bana ferâğ-ı mu‘teber-i kat‘î ile bâ-re’y-i mütevellî ferâğ ve tefvîz ben dahi tefevvüz ve kabûl etmişdim deyü kāimmakām-ı hâzır-ı mezbûrun tasdîkiyle bir kıt‘a mütevellî temessükü ibrâzıyla sûret-i def‘de eylediği müdde‘âsını lede’t-tezkiye makbûlü’ş-şehâde idükleri ihbâr olunan Mehmed Emin b. Mustafa ve Hüseyin Efendi b. Mustafa şehâdetleriyle bi’l-muvâcehe vech-i şer‘î üzere isbât etmeğin mûcebince müdde‘iye-i mezbûre Esma Hatun menzil-i mezkûr mutâlebesiyle mezbûre Âişe Hatun’a bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 15 C sene 1223.