İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 455 Hüküm no: 438 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap esnafının talebi üzerine kasaplar kethudalığına tayin olunan Ahmed Ağa’ya Sultan Abdülhamid Han Vakfı mütevellilerinden bir senet verilmesi gerektiği Kasab kethudâlığı nasbı Ma‘rûz Âsitâne-i aliyye ve tevâbi‘i olan Bilâd-ı selâse’de kâin kassâbân-ı ganem esnâfının müsinn ü ihtiyâr ustalarından el-Hâc Hafız Mehmed Emin ve el-Hâc Osman ve es-Seyyid Molla Hasan ve es-Seyyid Molla Ahmed ve Hafız Mehmed ve Mustafa Alemdâr ve Mehmed ve es-Seyyid İbrahim ve sâirleri meclis-i şer‘-i münîrde esnâf-ı mezbûreden bâ‘isü’l-i‘lâm el-Hâc Hasan Ağa dâmâdı Ahmed Ağa b. İbrahim mahzarında herbiri takrîr-i kelâm edip beher sene esnâfımızın ihtiyâr ustaları re’yleriyle esnâfımıza müte‘allik vukū‘-yâfte olan umûr ve husûslarımızı rü’yet için bir kethudâ nasb olunmak mu‘tâd-ı kadîm olduğuna binâen bundan akdem kethudâmız olan işbu hâzır bi’l-meclis Süleyman Ağa b. el-Hâc Ömer nâm kimesne kethudâlık-ı mezkûrdan rızâsıyla keff-i yed etmekle yerine cümlemizin mu‘temed ve muhtârımız olup her vechile kethudâlık uhdesinden gelmeğe kādir olan mezbûr Ahmed Ağa esnâf-ı mezkûre üzerine kethudâ nasb ü ta‘yîn olunması matlûbumuzdur dediklerinde hakīkat-i hâl esnâf-ı merkūme ustaları merkūmûnun takrîr-i meşrûhları üzere olmağla cümlesinin marzî ve muhtârı olan mezbûr Ahmed Ağa ber-vech-i meşrûh esnâf-ı merkūme üzerine kıbel-i şer‘den kethudâ nasb ü ta‘yîn olundukda ol dahi kabûl ve hizmet-i lâzımesini kemâl-i sadâkāt ve istikāmetle rü’yete ta‘ahhüd ve iltizâm etmekle ber-mûceb-i şurût-ı nizâm merkūm Ahmed Ağa’nın kethudâlığını müekkid Hudâvendigār-ı sâbık cennet-mekân firdevs-âşiyân merhûm ve mağfûrun-leh Sultan Abdülhamid Han -tâbe serâhû- evkāf-ı celîleleri mütevellîlerinden yedine temessük i‘tâ olunması iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 29 C sene [1]223.