İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 456 Hüküm no: 439 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardıros, Elmas ve Aksabet’in evlerinin üzerine yaptırdığı taraça ile evlerinin içini görür duruma gelen Melkon v. Agop aleyhine açtıkları davada davalının gerekli tedbirleri almaya söz vermesi üzerine anlaşmaya vardıkları Keşf Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi hâssa mi‘mârı hulefâsından es-Seyyid Mehmed ve Mehmed Hasib halîfeler ile nezâret-i dâ‘îlerinde âsûde evkāfdan Davud Çavuş Vakfı müsakkafâtından İstanbul’da Gedikpaşa kurbünde Dîvânî Ali mahallesinde vâki‘ münâza‘un-fîh olan menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde arzuhâl eden Mardıros v. Nikagos ve şahısları mu‘arrefe olan Elmas bt. Karabet ve Aksabet bt. Nikagos nâm Nasrâniyeler meclis-i ma‘kūd-ı mezkûrda derûn-ı arzuhâlde mastûrü’l-ism Melkon v. Agop nâm zimmî muvâcehesinde vakf-ı mezbûrun kāimmakām-ı mütevellîsi es-Seyyid el-Hâc Mehmed Emin b. Mehmed hâzır olduğu hâlde mesfûr Melkon zimmî bu esnâda menzilinin fevkānîsinde ihdâs eylediği tahtapûşundan bizim menzilimizin makarr-ı nisvân olan mevâzi‘ine nezâret ve zarar-ı beyyini olmağla nezâretini def‘a mesfûr Melkon zimmîye tenbîh matlûbumuzdur deyü da‘vâ eylediklerinde mi‘mârân-ı mezbûrân ba‘de’l-keşf ve’l-mu‘âyene mesfûr Melkon zimmî ihdâs eylediği tahtapûşun tûlen beş zirâ‘ ve kadden iki zirâ‘ yedi parmak kanadlık çam tahtasından muhkem kaplama vaz‘ıyla müdde‘ûn-ı mersûmûnun menzili tarafına olan nezâretini def‘a ta‘ahhüd eyledikde müdde‘iyûn-ı mesfûrûn dahi râzılar olup bu vechile kat‘-ı nizâ‘ eylediklerini mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr. Fî-selhi C sene [1]223.