İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 456 Hüküm no: 440 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hicrî 1223 senesinin Receb ayının ilk Cuma gecesinin Regaib gecesi olması münasebetiyle camilerde ve minarelerde kandiller yakılmasının ilgililere tenbih olunduğu Receb-i şerîf Bâ-sah İstanbul kādısı izzetlü fazîletlü efendi hazretleri İşbu i‘lâmınız huzûr-ı hümâyûn-ı mülûkâneye dahi arz ve takdîm ile manzûr-ı şâhâne buyurulmuş olmağla ber-mûceb-i i‘lâm leyle-i mübâreke-i mezkûrede minârât ve cevâmi‘de îkād-ı kanâdîl olunması husûsu iktizâ edenlere tenbîhe himmet eyleyeler deyü. Fî 2 B sene [12]23 Dergâh-ı cihân-mutâ‘ ve bârgâh-ı sipihr-irtifâ‘a ma‘rûz-ı abd-ı dâ‘î-i adîmü’l-istitâ‘alarıdır ki İşbu sâl-i bâhirü’l-yümn ve’ş-şeref sene-i selâse ve ışrîn ve mi’eteyn ve elf Cumâdelâhire gurresi yevm-i isneynden mazbût olup Recebi’l-ferd’i gurresi hâlâ bi’r-rü’ye sâbite olmamağla tekmîl-i selâsîn ile gurre-i Receb-i şerîf yevmü’l-erbi‘â’dan mu‘teber ve işbu Cum‘a-i ûlâsının leyle-i mergūbe-i mübârekesi olan regāib gecesine ta‘zîmen ve ihtirâmen âdet-i hasene-i Devlet-i Aliyye ve kāide-i müstahsene-i Saltanat-ı Seniyye üzere tefrîh-i kulûb-ı müminîn ve müminât için minârât-ı me‘âbid ve cevâmi‘ îkād-ı kanâdîl-i nûr-efşân ile tezyîn olunmak husûsu selâtîn-i âlî-şân aleyhim rahmetü mine’r-Rahmân hazerâtı cevâmi‘-i şerîfeleri kayyumlarına bâ-fermân-ı âlî tenbîh olunmak iktizâ eylediği İstanbul Mahkemesi’nden dergâh-ı felek-fersâ ve bârgâh-ı sipihr-i‘tilâları türâbına i‘lâm olundu. Bâkī emr ü fermân li-hazreti veliyyü’n-ni‘meti ve’l-ihsân.