İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 457 Hüküm no: 441 Orijinal metin no: [63a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın havaleden Zeytinyağcı Kostantin’den altı yüz elli kuruş alacağı olduğu 650 guruş hüküm Ma‘rûz Ali Ağa b. Osman nâm kimesne meclis-i şer‘-i münîrde derûn-ı arzuhâlde mastûrü’l-ism zeyt yağcı Kostantin v. Anton zimmî muvâcehesinde târih-i i‘lâmdan iki sene mukaddem ben Midillü Cezîresi’nden Âsitâne-i aliyye’ye gelir iken Molova kasabasında mütemekkin zimmî-i mersûmun şerîki İsterati zimmî süftece tarîkıyla malımdan iktirâz ve kabz eylediği bin dört yüz guruşu yedime i‘tâ eylediği Rumiyyü’l-ibâre bir kıt‘a poliçe temessükü nâtık olduğu üzere beni deyn-i mezkûruyla Âsitâne-i aliyye’de şerîki işbu mersûm Kostantin zimmî üzerine havâle ben dahi havâle-i mezkûreyi kabûl ve Âsitâne-i aliyye’ye gelip temessük-i mezkûru mersûm Kostantin zimmîye irâe ve havâle-i mezkûreyi ifâde ve i‘lâm eylediğimde ol dahi kabûl ve meblağ-ı merkūm cihet-i merkūmeden sana deynimdir deyü ikrâr ve otuz bir gün mürûrunda meblağ-ı muhâlün-bih merkūmun yedi yüz elli guruşunu bana edâ ve teslîm ve mâ‘adâsı olan altı yüz elli guruşu hâlâ zimmetinde olmağla taleb ederim deyü da‘vâ etdikde ol dahi cevâbında kaziyye minvâl-i meşrûh üzere olduğunu bi-tamamihâ ikrâr ü i‘tirâf edip lâkin ben havâle-i mezkûreyi [63b] kabûl eylediğimden sonra şerîkim mersûm İsterati zimmî bana mektûb gönderip meblağ-ı merkūm bin dört yüz guruşu merkūm Ali Ağa’dan almadan poliçe temessüğünü yedine vermiş idim kabûl etmeyesiz eğer meblağ-ı mezbûru verdin ise geri alıp poliçe temessüğünü kendiye red eyle deyü tahrîr etmekle binâen-aleyh ben dahi meblağ-ı merkūmu kabûlüme ve mikdâr-ı mezkûrumu edâ ve teslîme nâdim olmamla mâ‘adâyı vermediğimden başka medfû‘um olan meblağ-ı merkūm yedi yüz elli guruşu dahi geri taleb ederim deyü takrîri üzere havâle-i mezkûreyi kabûlünü mukırr u mu‘terif iken tasaddî eylediği da‘vâsı meşrû‘a ve iltifâta şâyân olmamağla alâ-mûcibi ikrârihî meblağ-ı bâkī-i merkūm altı yüz elli guruşu müdde‘î-i mezbûr Ali Ağa’ya edâ ve teslîmiyle mersûm Kostantin zimmî ilzâm olundu İstanbul Mahkemesi’nden huzûr. Fî-selhi C sene 1223.