İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 463 Hüküm no: 447 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celep Üstüyan’ın sattığı koyun bedelinden Kasap Mustafa Beşe’den altı yüz seksen beş kuruş on para alacağı olduğu 685 guruş 10 para hüküm Ma‘rûz Arzuhâl eden celeb tâifesinden Üstüyan v. [İ]stiko nâm zimmî meclis-i şer‘-i hatîrde Fındıklı’da Salıpazarı nâm mahâlde sâkin Kasab Mustafa Beşe b. Mehmed muvâcehesinde mezbûr Mustafa Beşe zimmetinde bundan akdem malımdan ve yedimden beher re’si on bir guruş bir rub‘a olmak üzere iştirâ ve kabz eylediği yüz altmış bir re’s ganem semeninden cem‘an bin sekiz yüz on bir guruş on paradan bâkī altı yüz seksen beş guruş on para alacak hakkım olmağla meblağ-ı bâkī-i mezkûru merkūm Mustafa Beşe’den hâlâ taleb ederim deyü ba‘de’d-da‘vâ ve’l-istintâk ol dahi cevâbında kaziyye minvâl-i meşrûh üzere olduğunu bi-tamamihâ kat‘iyyen ve tâyi‘an ikrâr ü i‘tirâf etmeğin alâ-mûcibi i‘tirâfihî meblağ-ı bâkī-i mezkûr altı yüz seksen beş guruş on parayı müdde‘î-i mesfûr Üstüyan zimmîye edâsıyla mezbûr Mustafa ilzâm olunduğu İstanbul Mahkemesi’nden huzûr. Fî 2 Receb sene [12]23.